Oda e Fizioterapeutëve të Kosovës ka dorëzuar padi në Gjykatën Themelore në Prishtinë kundër vendimit të Agjencisë së Akreditimit të Kosovës (AKA) për akreditimin e programit “Fizioterapi dhe Rehabilitim” në Fakultetin e Mjekësisë të UP-së.
Kryetari i OFTK-së, Feim Gashi, ka theksuar se vendimi i AKA-së përmban shkelje të shumta ligjore dhe nuk respekton asnjë standard apo rekomandim të ekspertëve ndërkombëtarë, të cilët kishin kërkuar që emërtimi i programit të jetë vetëm “Fizioterapi”.
Sipas tij, me këtë vendim janë bërë shkelje të shumta ligjore dhe nuk është respektuar asnjë kriter.
Gashi ka deklaruar se AKA nuk i ka respektuar rekomandimet e ekspertëve, të cilët kanë dhënë rekomandim obligues që të ndryshohet emri nga “Fizioterapi dhe Rehabilitim” në vetëm “Fizioterapi”. Madje, ky rekomandim është dashur të respektohet para se të fillojë implementimi i programit.
“Si Odë e Fizioterapisë nuk jemi kundër UP-së. Ne kemi hapur dyert e bashkëpunimit sa i përket programit të fizioterapisë, por jo që të akreditohet në këtë formë, duke mos respektuar asnjë standard ndërkombëtar. Edhe vetë ekspertët që ka angazhuar Agjencia nuk janë vlerësuar; edhe pse në vendim thuhet se ai është marrë konform ekspertizës së ekspertëve ndërkombëtarë për vlerësimin e programit, ata nuk janë konsideruar si ekspertë. Ata kanë dhënë disa rekomandime të cilat nuk janë zbatuar në vendim”, ka deklaruar Gashi.
Sipas tij, bartësit e programit nuk janë të profilit të fizioterapisë dhe mungojnë thirrjet akademike adekuate. OFTK ka kërkuar edhe masë sigurie për pezullimin e vendimit deri në shqyrtimin e plotë të çështjes.
Avokati i OFTK-së, Florian Petani, ka deklaruar se vendimi i Agjencisë së Akreditimit për programin “Fizioterapi dhe Rehabilitim” përmban shkelje të rënda që rrezikojnë të shkaktojnë pasoja të pariparueshme për studentët.
