Ushtari i Ushtrisë së Malit të Zi, Rajko Krivokapiq, është ndëshkuar për shkelje disiplinore, pasi në nëntor të vitit të kaluar kishte udhëtuar në mënyrë të paautorizuar drejt Kosovës, ku u arrestua për vendosjen e mbishkrimit “Kosova është Serbi” në targat e automjetit të tij. Ndërkohë, procedura disiplinore pati ndaj shoqëruesit të tij, Dragutin Lalatoviq, i cili u pezullua pasi ai u largua vullnetarisht nga shërbimi ushtarak.
Lajmi u konfirmua për gazetën “Vijesti” nga Ministria e Mbrojtjes e Malit të Zi, e cila bëri të ditur se procedurat disiplinore për të dy ushtarët përfunduan pas shqyrtimit të provave dhe dëshmive përkatëse.
Krivokapiq dhe Lalatoviq, së bashku me Marinko Jovanoviq, u arrestuan më 24 nëntor në Deçan, pas pjesëmarrjes në një ceremoni fetare. Ata u ndaluan nga autoritetet kosovare për shkak të targave me mesazhe politike dhe u akuzuan për “nxitje të urrejtjes dhe intolerancës”.
Fillimisht u dënuan me 30 ditë paraburgim, i cili më pas u zgjat edhe për 30 ditë të tjera. Në total, ata kaluan 55 ditë në paraburgim, para se të liroheshin më 16 janar, ndërsa një ditë më vonë, Zyra e Prokurorit Special të Kosovës pezulloi hetimet ndaj tyre.
Sipas Ministrisë së Mbrojtjes, Krivokapiq u shpall fajtor për shkelje disiplinore dhe u ndëshkua në përputhje me Ligjin për Ushtrinë e Malit të Zi. Detajet mbi natyrën e shkeljes dhe dënimin konkret nuk janë bërë publike. Megjithatë, një burim nga ministria i tha gazetës “Vijesti” se ndëshkimi i Krivokapiqit “ndoshta ishte financiar”.
Ndërkohë, procedura kundër Lalatoviqit u pezullua, pasi ai ndërpreu marrëdhënien e punës me ushtrinë me kërkesën e tij. Ai nuk do të përballet më me ndëshkime të mundshme disiplinore.
Burime nga Forcat e Armatosura të Malit të Zi pohuan se të dy ushtarët nuk kishin raportuar paraprakisht udhëtimin e tyre jashtë vendit, siç kërkohet nga ligji ushtarak. U zbulua gjithashtu se njëri prej tyre kishte qenë në pushim mjekësor që nga tetori, ndërsa tjetri kishte filluar pushimin mjekësor menjëherë para incidentit.
Ligji për Forcat e Armatosura e ndalon pjesëmarrjen aktive në detyrë të një ushtari nëse është në paraburgim, në ndjekje penale apo përfshirë në procedura disiplinore. Gjatë pezullimit, ushtarit i paguhen 2/3 e pagës mujore, ose 3/4 nëse mban një familje.
Ministri i Mbrojtjes, Dragan Krapoviq, deklaroi pas ngjarjes se “asgjë nuk do të bëhet me nxitim” dhe se “çdo fakt do të shqyrtohet me kujdes”, duke theksuar se të dy ushtarët kishin qenë të vlerësuar pozitivisht në shërbim para incidentit.
Arrestimi i tyre shkaktoi reagime të shumta në opinionin publik dhe politikën malazeze. Kryetari i Kuvendit, Andrija Mandiq, kërkoi lirimin e menjëhershëm të tyre nga autoritetet në Prishtinë, ndërsa zëvendëskryeministri Filip Ivanoviq kërkoi një proces të drejtë dhe respektim të të drejtave të qytetarëve malazezë.
