Aleatët e Ukrainës po finalizojnë një plan për t’i ofruar garanci ushtarake Ukrainës për të mbështetur vendin përballë agresionit të vazhdueshëm rus, tha Presidenti francez Emmanuel Macron të mërkurën në mbrëmje në Pallatin Elysee, ndërsa priti Presidentin ukrainas Volodymyr Zelensky.
Më 4 shtator, në Paris do te zhvillohet një takim i të ashtuquajturit “koalicion i të vullnetshmëve” – një grup aleatësh të Kievit që përfshin rreth 30 vende . Ata po diskutojnë, personalisht dhe nëpërmjet lidhjes video, se si saktësisht mund të garantojnë sigurinë e Ukrainës pas përfundimit të luftës.
Macron, në një pritje në nder të Zelensky-t, tha se puna e bërë nga udhëheqësit ushtarakë evropianë që nga samiti ukrainas në Shtëpinë e Bardhë në mesin e gushtit hapi rrugën për veprim të shpejtë pas marrëveshjes së paqes midis Kievit dhe Moskës. Emmanuel Macron tha se propozimet për garancitë e sigurisë u miratuan të mërkurën nga ministrat e mbrojtjes të aleatëve të Ukrainës në fshehtësi. “Tani mund të themi se kjo punë është e përfunduar dhe gati për miratim politik”, shtoi udhëheqësi francez.
Në përgjigje të fjalëve të Macron, Volodymyr Zelensky tha se e mirëpriti progresin e arritur. Garancitë përfaqësojnë mbështetje reale dhe të prekshme për Ukrainën, jo premtime simbolike, theksoi Zelensky. Ai shtoi se iniciativat e mëparshme të koalicionit, të cilat askush fillimisht nuk i besonte, janë zbatuar dhe tashmë po funksionojnë.
Garancitë e sigurisë do të përfshijnë forcimin e ushtrisë ukrainase, dërgimin e trupave tokësore për të siguruar paqen në Ukrainë. Aleatët e Ukrainës mbështeten gjithashtu në angazhimet e sigurisë nga SHBA-të, vëren DPA.
Pas takimit të “koalicionit të të vendosurve” në kryeqytetin francez, udhëheqësit e grupit planifikojnë të telefonojnë Presidentin e SHBA-së Donald Trump, pas të cilit pritet të mbajnë një konferencë për shtyp.
