Zëdhënësi i Kremlinit, Dmitry Peskov, i tha agjencisë shtetërore ruse RIA se prania ushtarake e huaj nuk mund të jetë garanci sigurie për Ukrainën.
“A mund të garantojnë vendet e huaja, veçanërisht trupat evropiane dhe amerikane, sigurinë e Ukrainës? Sigurisht që nuk munden”, raportoi RIA fjalët e Peskov, duke theksuar se zgjidhje të tilla nuk janë të pranueshme për Moskën si një formë garancie.
Komenti i tij erdhi pasi Presidenti francez Emmanuel Macron, pas samitit të aleatëve të Kievit, njoftoi se 26 vende janë gati të marrin pjesë në forcat ndërkombëtare që do të vepronin si garanci sigurie për Ukrainën në rast të një marrëveshjeje paqeje me Rusinë.
Macron tha se këto forca do të dislokoheshin në tokë, në det ose në ajër, por nuk specifikoi se cilat vende ishin të përfshira. Megjithatë, dihet se midis tyre janë Franca dhe Mbretëria e Bashkuar.
Peskov gjithashtu i theksoi agjencisë Interfax se për momentin nuk ka plane për një bisedë midis presidentit rus Vladimir Putin dhe presidentit amerikan Donald Trump, por se një takim i tillë mund të organizohet shpejt nëse është e nevojshme.
Nga ana tjetër, Trump tha të enjten se pret të flasë me Putinin në të ardhmen e afërt. Ai shtoi se gjatë karrierës së tij politike zgjidhi shumë konflikte, por lufta në Ukrainë është sfida më e vështirë me të cilën është përballur deri më tani.
