Njëri nga dy të rinjtë në videon e publikuar nga krahu i armatosur i Hamasit është shtetasi serb Alon Ohel (22), i cili ka qenë në robëri për gati dy vjet, shkruan N1 Serbia .
Videoja fillimisht tregon pengun izraelit Gaj Gilboa-Dalal duke kaluar me makinë nëpër Gaza dhe duke thënë se është rrëmbyer për 22 muaj, ndërsa kamera tregon ndërtesa të shkatërruara. Në fund, Alon Ohel i bashkohet atij, dhe të dy përqafohen dhe, dukshëm të habitur, përsërisin se nuk mund ta besojnë që po takohen përsëri.
Videoja zgjat më shumë se tre minuta e gjysmë, dhe ndër të tjera, Gilboa-Dalal i bën thirrje kryeministrit izraelit Benjamin Netanyahu në hebraisht që të mos e kryejë ofensivën e planifikuar ushtarake në Gaza. Ai deklaron se ndodhet në Gaza dhe se regjistrimi është bërë më 28 gusht 2025.
Sipas mediave izraelite, familja e Alon Ohel konfirmoi se ai ishte në video, por nuk dha leje që media ta publikonte videon.
Reuters publikoi pjesën e parë të pamjeve filmike, ku shihet vetëm Gaj Gilboa-Dalal.
Alon Ohel (22) është një pianist izraelit i cili është mbajtur peng nga Hamasi për gati dy vjet, pasi u rrëmbye gjatë sulmit në festivalin Nova më 7 tetor 2023. Ohel ka shtetësi izraelite, serbe dhe gjermane – serbe për shkak të prejardhjes së tij familjare, pasi paraardhësit e tij janë nga Novi Sadi, dhe gjermane për shkak të gjyshes së tij Tzipi Ohel, e cila lindi në Berlin dhe emigroi në Izrael pas Luftës së Dytë Botërore.
Sipas raportimeve të mediave izraelite dhe të huaja, Ohel pësoi lëndime të rënda në robëri – thuhet se ai është verbuar pjesërisht nga shrapneli – dhe prindërit e tij i kanë bërë thirrje bashkësisë ndërkombëtare, përfshirë Serbinë, për muaj të tërë që ta lirojnë atë.
