Kryetari i Federatës së Futbollit të Kosovës, Agim Ademi, ka reaguar pas humbjes së thellë të Dardanëve në Bazel, duke thënë se ekipi ende ka punë përpara, por se beson në rikthimin e tyre.
Ademi pranoi se disfata ishte e dhimbshme, por theksoi se netë të tilla janë pjesë e futbollit. Ai u shpreh i bindur se Kosova do të mësojë nga kjo përvojë dhe do të kthehet më e fortë në ndeshjet e ardhshme, duke nisur nga sfida e së hënës kundër Suedisë.
Kreu i FFK-së falënderoi tifozët për mbështetjen e jashtëzakonshme, sidomos grupin “Dardanët” dhe bashkatdhetarët, që mbushën stadiumin dhe qëndruan pranë kombëtares deri në fund.
“Dardanët kanë nevojë për mbështetje pikërisht në situata të tilla. Forca jonë më e madhe është uniteti”, tha Ademi, duke ftuar tifozët të jenë sërish në krah të kombëtares.
Ai kujtoi se Kosova ka pasur momente krenarie dhe se ngritjet e uljet janë të zakonshme në futboll, ndërsa shprehu besim se me punë, disiplinë dhe besim ekipi do të rikthehet fuqishëm.
“Këta djem kanë ditur të na bëjnë krenarë dhe secili që e njeh futbollin e dinë se ka ngritje dhe ulje. Uroj që rikuperimi i ekipit të jetë i shpejt, pasi përpara kemi sfida të tjera dhe jam i bindur se me punë, disiplinë dhe besim do të arrijmë të rikthehemi fuqishëm. Kombëtarja është e të gjithëve dhe duhet ta mbështesim në ditë të mira, por edhe në ditë të vështira”, ka shkruar Ademi.
