Pos zhurmës e gumëzhimave ditore, banorët e kryeqytetit janë në hall edhe nga zhurmat e automjeteve që qarkullojnë gjatë natës.
Pos vapës së verës, shqetësim edhe më i madh nga mesnata që nisej me vrull, vazhdon edhe më tej zhurma e padurueshme e automjeteve e sidomos motoçikletave. Qytetarët e shumë lagjeve edhe më tej mbesin të shqetësuar, me këtë dukuri që nuk ka fund.
“Ka nevojë për qetësi. Nuk janë këto gara. Granat janë veçmas e jo nëpër qytet. Ka njeri që kanë probleme shëndetësore e jo ai me dal këtu që ka blerë motorr 3- 4 mijë euro e shqetëson, nuk është në rregull, sinqerisht. Kjo është kulminacion i dobësisë i kulturës tonë”, ka thënë qytetari Besnik Fejzullahu.
“Lëre që na shqetësojnë, por na i tranuan fëmijët nëpër banesa, motorët në gjysmë të natës për Gërmi duke shkuar prej 2 të natës. Ku është policia jonë”, ka shtuar një tjetër qytetarë.
Kjo dukuri ka zënë vend edhe në evidencat e policisë, ndaj edhe është vënë në zbatim Plani Operativ, “Siguria në Trafik 2025”, i cili ka hyrë në fuqi më 1 korrik dhe është ende në zbatim.
“Është e vërtetë që gjatë sezonës së verës, është ngrit numri i qarkullimit të automjeteve dhe motorrqikletave në kryeqytet. Në kuadër të kësaj, policia e Kosovës, konkretisht Drejtoria e Kryeqytetit në kuadër të planit operativ “Siguria në trafikun rrugor 2025” ka hartuar dhe ka implemetu planin e veprimit “Motorrçikletat”. Kjo për arsyeje se kemi pasur mjaft ankesa nga qytetarët , për zhurmë të shkaktuar nga automjetet dhe motorrçikletat gjatë orëve të natës dhe në këtë drejtim fokusi ka qenë ndërmarrja e masave preventive të policisë ndaj kundërvajtësve të shkaktuara posaçërisht nga motorrçikletat. Në këtë drejtim përveç masave tjera, vetëm Njësia e Trafikut të Kryeqytetit, ka shqiptuar rreth 6 mijë gjoba ndaj kundërvajtësve, prej tyre janë rreth 800 të motorrçikletave”, ka thënë Mentor Muja, komandant i Njësisë së Trafikut për Kryeqytet.
Në evidencat e policisë janë regjistruar rreth 100 motorë të konfiskuar gjatë sezonit veror, ndërkohë që ngasësit edhe janë gjobitur.
“Një pjesë e gjobave ka qenë edhe për zhurmën të shkaktuar nga motorrçikletat gjatë orëve të vona, siç është startimi i vrullshëm, është kundërvajtje e veçantë kjo dhe në këtë drejtim policia ka shqiptuar edhe disa gjoba për zhurmë të shkaktuar e cila i ka shqetësua qytetarët, zhurmë kjo e pa nevojshme e pa durueshme për qytetarët. Në kuadër të kësaj policia edhe ka konfiskuar rreth 100 motorrçikleta për kundërvajtje që e parasheh Ligji, raste kur ato duhet të largohen nga komunikacioni”, ka shtuar Muja.
Policia vazhdon t`u bëj thirrje ngasësve , posaçërisht drejtuesve të motorëve, që të mos krijojnë zhurmë të panevojshme dhe të respektojnë rregullat e komunikacionit.
