Një gjyqtar i Gjykatës së Lartë të Viktorias tha se ishte një nga krimet më të rënda në vend dhe theksoi se Patterson nuk kishte treguar asnjë pendim. Ajo u dënua me burgim të përjetshëm pa mundësinë e lirimit me kusht.
Patterson (50) u shpall fajtore për vrasjen e vjehrrit të saj Donald Patterson, vjehrrës Gail Patterson dhe motrës së saj Heather Wilkinson. Ajo u shpall gjithashtu fajtore për tentativën e vrasjes së bashkëshortit të Heather, Ian Wilkinson, i cili i mbijetoi drekës pasi kaloi javë të tëra në spital.
Në vitin 2023, ata hëngrën mish viçi Wellington të përgatitur me kërpudha helmuese në shtëpinë e saj në Leongatha, në juglindje të Melburnit.
Gjykatësi Christopher Beale tha gjatë dhënies së dënimit se krimet ishin planifikuar me kujdes dhe se ato shkatërruan disa familje.
Gjykatësi deklaroi se ajo ndoshta do të mbetet në izolim në të ardhmen dhe se do të ketë të drejtë të aplikojë për lirim me kusht vetëm kur të mbushë 82 vjeç.
Patterson vazhdon të këmbëngulë se është e pafajshme dhe se helmimi ishte aksidental.
Tragjedia ndodhi më 29 korrik 2023, kur Patterson shtroi një drekë në shtëpinë e saj për katër mysafirë: ish-vjehrri dhe vjehrra Don dhe Gail Patterson (të dy 70 vjeç), motra e Gail, Heather Wilkinson (66) dhe bashkëshorti i saj Ian Wilkinson, një pastor vendas. Erin shërbeu mish viçi Wellington atë ditë – një pjatë me biftek me pate kërpudhash, në brumë sfoliatë.
Disa ditë më vonë, tre mysafirë vdiqën nga helmimi, ndërsa Ian mezi mbijetoi pas një qëndrimi të gjatë në spital. Erin Patterson, e cila dyshohet se hëngri të njëjtin vakt, nuk kishte ndonjë simptomë serioze, gjë që ngriti menjëherë dyshime tek hetuesit.
