Dogana e Kosovës ka njoftuar se është ndaluar një automjet në territorin e Prishtinës, ku gjatë kontrollit janë gjetur dhe sekuestruar produkte të padoganuara të llojit “botox” dhe “fillerë”, të destinuara për përdorim estetik.
Pas veprimeve të mëtejshme operative dhe në koordinim me prokurorin kompetent, është kryer edhe kontroll në një lokacion tjetër në Prishtinë, ku është gjetur dhe ndaluar një sasi shtesë e këtyre produkteve. Vlera e përgjithshme e mallrave të ndaluara arrin rreth 5,000 euro.
Autoritetet njoftojnë se këto produkte, për shkak të kontaktit të drejtpërdrejtë me trupin e njeriut, paraqesin rrezik të madh për shëndetin e qytetarëve nëse nuk kontrollohen dhe transportohen në mënyrë adekuate.
Rasti po trajtohet sipas procedurave ligjore si kundërvajtje doganore. Dogana e Kosovës thekson përkushtimin e saj në parandalimin dhe luftimin e kontrabandës, duke mbrojtur tregun vendor dhe shëndetin e popullatës.
