Kryetari i Aleancës për Ardhmërinë e Kosovës, Ramush Haradinaj, ka shprehur mbështetjen për protestën që do të mbahet këtë të diel, më 14 shtator, në Hagë, nga bashkatdhetarët dhe organizatat e dala nga lufta.
Haradinaj ka theksuar se protesta është një porosi e fuqishme për drejtësinë dhe një dëshmi se lufta e Kosovës ka qenë e drejtë dhe çlirimtare.
“Personalisht s’mund të marr pjesë, por siç e dini, ne gëzojmë respekt dhe autoritet te një pjesë e diasporës, jo vetëm tani, por edhe te patriotët e hershëm shqiptarë, të gjithë ata që janë liridashës. E mbështes protestën si një porosi që lufta jonë ishte e drejtë, ishte çlirimtare dhe mbetet e tillë. I ftoj të gjithë ata që kanë mundësi, që me prezencën e tyre të japin një mesazh të fuqishëm: se lufta për çlirimin e Kosovës ishte e drejtë dhe çlirimtare”, deklaroi Haradinaj.
Haradinaj këto komente i bëri pas homazheve në kujtim të viktimave të sulmeve terroriste të 11 Shtatorit në Shtetet e Bashkuara të Amerikës.
