Farërat hibride të specit sombor këtë vit kanë thyer rekord në prodhim, duke sjellë rendiment dyfish më të lartë sesa farërat tradicionale të këtij lloji. Ekspertët bujqësorë po vlerësojnë se hibridi i specit sombor ka rezultuar shumë i suksesshëm, duke arritur deri në 60 tonë për hektar. Madje, kjo ka shtyrë disa bujq të shkatërrojnë plantacionet me mollë, për shkak të çmimit të ulët të tyre, dhe t’i zëvendësojnë me këtë lloj hibridi të specit sombor.
Rexhep Spahiu nga fshati Llugagji i komunës së Lipjanit thotë për emisionin Toka në RTK se, edhe përkundër kushteve jo të favorshme klimatike, nga tre llojet e mbjella me speca sombor, njëri hibrid ka rezultuar më i suksesshëm se të tjerët.
“Një hibrid i specit sombor ka rezultuar shumë i suksesshëm në krahasim me farat e vjetra, ku rendimenti ka dalë më shumë se dyfish më i lartë,” thotë Spahiu.
Ai shton se sipërfaqet e mbjella me këtë kulturë kanë të instaluar sistemin pikë-pikë të ujitjes, mekanizëm që ka ndikuar që specat të zhvillohen mirë edhe në temperaturat e larta që po mbretërojnë në vend.
Spahiu tregon se, duke parë që plantacionet e mollëve nuk po sillnin fitim, ka shkatërruar disa hektarë të mbjella me mollë, edhe pse të pajisura me sistem kundër breshrit dhe tashmë po kultivon speca të llojeve të ndryshme në ato sipërfaqe.
“Shitja nuk është problem, pasi pothuajse e tëra eksportohet jashtë vendit, ndërkohë që edhe çmimi është i kënaqshëm. Porse, problematikë e vazhdueshme mbetet fuqia punëtore. Vetëm në procesin e vjeljes, brenda ditës angazhojmë deri në 30 punëtorë,” thotë Spahiu.
Se rendimenti i specave somborë këtë vit është i lartë, e pohon edhe agronomi Sylejman Bajrami, i cili është i angazhuar drejtpërdrejt në mbikëqyrjen e sipërfaqeve të mbjella me spec sombor dhe pemishtet e Rexhep Spahiut në Llugagji të Lipjanit.
Bajrami për emisionin ‘Toka’ në RTK thotë se ky rendiment i lartë i specave sombor është arritur falë ngritjes profesionale të fermerëve, të cilët kanë filluar të përdorin fara cilësore.
“Të gjitha llojet e mbjella të somborit në Llugagji këtë vit kanë pasur më pak sëmundje dhe dëmtues, falë qasjes profesionale të trajtimit kundër tyre,” thotë Bajrami.
Eksperti i bujqësisë, Besim Sahiti, shprehet se rendimentet e larta që po arrihen vitet e fundit në vendin tonë vijnë falë përgatitjes më të mirë profesionale të fermerëve.
“Në Kosovë, 90 për qind e sipërfaqeve të mbjella me spec janë në fushë të hapur, ndërsa krahas specit sombor dominojnë edhe speci i kuq dhe ai i gjatë,” thotë Sahiti.
Ai thotë se, për të rritur suksesin në aspektin komercial, fermerët duhet të zëvendësojnë farërat e thjeshta me ato hibride cilësore.
“Krahas rendimentit, dallimi qëndron edhe në formë, shije dhe qëndrueshmëri ndaj ndryshimeve klimatike,” shton Sahiti për emisionin ‘Toka’ në RTK.
