Të burgosurit politikë bjellorusë të liruar më 11 shtator thanë se para deportimit të tyre nga Bjellorusia, oficerët bjellorusë të KGB-së ua morën pasaportat. Ata ia grisën pasaportën anarkistit Nikolai Dedok.
Në vend të pasaportave, të burgosurve politikë të liruar iu dhanë vetëm letra të përkohshme në madhësi A4, të cilat nuk kanë karakteristikat e një dokumenti të plotë identiteti, sipas nje deklarate nga zyra e Svetlana Tikhanovskayas.
“Njerëzve iu hoqën pasaportat e tyre kombëtare dhe u deportuan me forcë. Kjo nuk është vetëm një poshtërim i rëndë i dinjitetit njerëzor, por edhe një shkelje e të drejtave themelore të njeriut dhe e ligjit ndërkombëtar. Bjellorusia, si një vend që ka nënshkruar Paktin Ndërkombëtar për të Drejtat Civile dhe Politike, është e detyruar të sigurojë lirinë e lëvizjes dhe të respektojë të drejtën e shtetësisë”, tha këshilltari ligjor i Tikhanovskayas, Leonid Morozov.
Të enjten, pas vizitës në Minsk të Zëvendës Përfaqësuesit Special të Presidentit të SHBA-së Keith Kellogg, John Cole, dhe takimit të tij me Alexander Lukashenkon, autoritetet bjelloruse liruan 52 të burgosur politikë, përfshirë 14 shtetas të huaj. Të gjithë ata do të deportoheshin në Lituani, por njëri prej të liruarve, Nikolai Statkevich, refuzoi të largohej nga Bjellorusia. Vendndodhja e tij nuk dihet.
