Pas deklaratës së presidentes Vjosa Osmani, se kushtet jo të mira në shkollën fillore “Ismail Qemali” kanë qenë ndër arsyet që e kanë shtyrë t`i largojë vajzat e saj nga kjo shkollë, RTK ka vizituar institucionin për ta parë nga afër gjendjen aktuale të shkollës. Për këtë çështje është deklaruar edhe drejtoresha e këtij institucioni.
Drejtoresha e shkollës “Ismail Qemali” në Prishtinë, Mimoza Krasniqi, tha se arsyeja e largimit të vajzave të presidentes Osmani ka qenë ndërrimi i vendbanimit, dhe jo kushtet në shkollë, siç u interpretua.
“Gjatë pesë viteve të fundit shkolla ka funksionuar mirë, unë kam 5 vite që kam qenë ushtrues detyre, ndërsa tashmë është në vitin e tretë, si drejtoreshë me vendim. Arsyeja e largimit, sipas fletë-lëshimit, ka qenë ndryshimi i vendbanimit”, tha drejtoresha e shkollës “Ismail Qemali”.
Krasniqi shtoi se në shkollë nuk mungon siguria dhe as pajisjet digjitale për mësim, porse pranoi se kapacitetet janë të vogla krahasuar me numrin e madh të nxënësve. Ajo njoftoi se shkolla pritet të rinovohet në pranverën e të vitit të ardhshëm.
“Për shkak të rinovimit që pritet të bëhet, nuk janë ndërmarrë renovime të plota. Numri i madh i nxënësve ndonjëherë krijon parregullsi, por sa i përket sigurisë dhe ambientit të brendshëm, jemi në nivel të mire”, nënvizoi Krasniqi.
Lidhur me këto deklarata, RTK ka pyetur edhe të premtën në kabinetin e Presidentes. Bekim Kupina nga Presidenca ka thënë shkurt se ajo “dje është përgjigjur për gjithçka”. Sa u përket kërcënimeve ndaj saj dhe fëmijëve, Policia ende nuk ka dhënë përgjigje.
Lidhur me deklaratat e Osmanit ka reaguar ish-drejtoresha e Arsimit në Komunën e Prishtinës, Jehona Lushaku-Sadriu, duke thënë se megjithëse kishte informata për gjendjen e shkollave publike, ajo nuk ndërmori hapa për të siguruar fonde shtetërore apo donacione ndërkombëtare për renovimin e tyre.
