Kuvendi nisi sot seancën e parë të Legjislaturës XI, në zbatim të dekretit të Presidentit të Republikës, pas zgjedhjeve parlamentare të 11 majit.
Seanca drejtohet nga deputeti i qarkut të Vlorës i Partisë Socialiste, Vasil Llajo, si deputeti më i vjetër në moshë.
Në seancë marrin pjesë ambasadorë dhe përfaqësues të trupit diplomatik, të institucioneve kushtetuese, të komuniteteve fetare etj.
Deputeti Llajo në fjalën hapëse e cilësoi seancën moment solemn pasi siç u shpreh ai, “këtu fillon kapitulli i 4 viteve të ardhshme ku do të shkruhet historia e vendit tonë”.
Llajo u shpreh se, “çdo ligj, çdo reformë, çdo vendim duhet të ketë në qendër qytetarin dhe dinjitetin e tij”.
“Në këtë sallë do të ketë gjithmonë ndasi sepse ky është roli i një parlamenti, mazhoranca qeveris, opozita kontrollon dhe kritikon, por mbi këtë ndarje që është e shëndetshme për demokracinë duhet të ndërtohet një kulturë e re, kultura e bashkëpunimit për çështje te mëdha kombëtare. Ne nuk duhet të kemi merak të bashkëpunojmë, kur është fjala për interesin e vendit, përkundrazi duhet të kemi turp nëse nuk e bëjmë. Të ndahemi në debate, por të bashkohemi në qëllime, ky është Kuvendi që meriton mbarë shoqëria shqiptare”, tha Llajo.
Më pas u ngrit sekretaria e përkohshme e Kuvendit me përbërje tre deputetet më të reja, Mariana Koçeku, Zegjine Çaushi, Klodiana Çapja. Më pas, deputetja e PD-së Klodiana Çapja nuk iu bashkua dy kolegeve nga kampi socialist duke mos marrë vendin e saj në ulësen e sekretarisë së përkohshme.
Kreu i grupit parlamentar të PS-së, Taulant Balla propozoi emrat e komisionit të përkohshëm të verifikimit të mandateve, Milva Ekonomi, Olsi Komici, Aulona Bylykbashi, Hatixhe Konomi, Elton Koreshi dhe Arkend Balla.
Pas propozimit të anëtarëve, Kuvendi miratoi përbërjen e komisionit.
Llajo theksoi se, “Komisioni i përkohshëm për verifikimin e manadateve do të bëjë mbledhjen e tij të parë, do të zgjedhë kryetarin dhe do të marrë dokumentacionin përkatës të zgjedhjeve, do të verifikojë mandatet dhe do t’i paraqesë Kuvendit në seancë plenare raportin për vlefshmërinë e mandateve”.
Ndërsa deputetët demokratë bllokuan foltoren, Llajo mbylli seancën dhe njoftoi se seanca e ardhshme do të mbahet pasditen e sotme në orën 17:00.
Kreu i Partisë Demokratike Sali Berisha si dhe disa deputetët të opozitës me pankarta në duar bllokuan foltoren e Kuvendit.
Kreu i PD-së kërkoi që të marrë fjalën në foltoren jashtë rendit të ditës, por drejtuesi i seancës së parë plenare, deputeti më i vjetër në moshë Vasil Llajo, ndërpreu fjalën e kryedemokratit.
“Nuk lexoi emrat e deputetëve të vërtetë të partisë së krimit, PS-së, por vetëm prestanomet”, u shpreh Berisha, ndërsa në foltore iu bashkuan edhe deputetë të tjerë demokratë.
“Ky është një narkoparlament. Ka një rregullore. Asnjë komision nuk ndryshohet pa ndryshuar rregulloren. Asnjë komision! Po për këtë nuk ka rregullore, nuk ka Kushtetutë”, tha Berisha duke iu referuar propozimeve të Kryeministrit Rama për riorganizimin e komisioneve të përhershme parlamentare.
Gjatë kësaj seance 140 deputetë të zgjedhur nga qytetarët do të betohen mbi Kushtetutën e Shqipërisë për përgjegjësitë përfaqësuese dhe ligjvënëse.
Rezultatet e 11 majit prodhuan 83 mandate për Partinë Socialiste, 50 mandate për Partinë Demokratike, 3 mandate për Partinë Socialdemokrate, 2 mandate për Partinë Mundësia, 1 mandat për “Shqipëria Bëhet” dhe 1 mandat për Lëvizjen Bashkë.
Nga 140 deputetë që ka Kuvendi i Shqipërisë, 72 ulen për herë të parë në karrigen e parlamentit.
Mosha mesatare e deputetëve është 47,5 vjeç, duke kombinuar përvojën me energjinë e re. 35% e deputetëve janë gra.
Të zgjedhurit vijnë nga profesione të ndryshme: 32 nga drejtësia, 31 nga ekonomia dhe të tjerë u përkasin fushave si mjekësia, shkencat natyrore, sociale, politike, po ashtu edhe nga inxhinieria, arti e sipërmarrja. 25 deputetë mbajnë gradën “Doktor i shkencave” dhe 5 deputetë mbajnë titullin “Profesor”.
