Në Barilevë të Prishtinës, shkolla fillore dhe e mesme e ulët “Ali Kelmendi” ka nisur një fazë të re mësimore. Me rreth 320 nxënës, nga klasa e parë deri në të nëntën, ajo është njëra nga shtatë shkollat që këtë vit shkollor po zhvillon mësimin tërëditor.
Është shkolla fillore e mesme e ulët “Ali Kelmendi” në fshatin Barilevë të komunës së Prishtinës, e cila tash e dy javë ka hyrë në një proces të ri shkollor. 320 nxënës nga klasa e parë deri në të 9-tën, kanë kaluar në fazën e re, atë të mësimit tërëditor.
Në njërën prej klasave, me gjithsej 11 nxënës, mësuesja tregon për përvojën e dy javëve të para. Sipas saj, zgjatja e orarit dhe kombinimi i mësimit me aktivitete të ndryshme po krijon përvojë pozitive për nxënësit,.
“Sa po shohim deri tash është duke pasur impakt pozitiv te nxënësit. Po kënaqen shumë, po vijnë në mësim prej orës 8:30 pastaj po i përfundojmë 2 orë dhe shkojmë të ushqehemi. Duke diskutuar me nxënës të tjerë po kalojmë kohë të bukur dhe pastaj sërish po i kthehemi mësimit dhe deri tani po vazhdon gjithçka si duhet. Po shpresoj që edhe më tutje do të pajisemi me resurse të nevojshme për me e zhvillu këtë pjesë të mësimit tërëditor, ndoshta me SMART Tabela ose çka do që DKA-ja e parasheh të nevojshme edhe besoj që na e kishin lehtësu punë edhe më tepër dhe orët do të kishin qenë shumë më atraktive për nxënësit. Por deri tash po mundohemi që qeto që i kemi në dispozicion me i shfrytëzu maksimalisht që me e nxjerr më të mirën prej nxënësve. Deri tash po shohim impakt pozitiv tash te shohim tutje dhe po shpresojmë që vazhdon njëjtë”, tha Diellza Abdullahu Rexha, mësuese klasore.
Por, sipas saj, procesi mbetet edhe sfidues.
“Normal që është sfiduese se kur përballemi me dicka të re është pak më ndryshe dhe mund të përballemi me vështirësi, por fatmirësisht deri tash gjithçka është duke shkuar mirë. Kemi pas dilema tek pjesa e planifikimit të këtyre aktivitetetve sepse nuk i kemi has pak me herët dhe tek pjesa tjetër se si po e presin nxënësit, se si po e pret komuniteti dhe apo kanë vështirësi nxënësit me u adaptu, por fatmirësisht deri tash është duke shkuar si duhet dhe po shpresojmë që njëjtë ka me vazhdu edhe më tutje”, tha ajo.
Drejtoresha e shkollës, Bedrie Pireva Shala, thotë se procesi është pritur mirë nga nxënësit, prindërit dhe mësimdhënësit.
“Kemi aktivitete, cikli ulët kanë pranuar mësimdhënësit të jenë me nxënësit e tyre, kanë aktivitete të ndrsyhme, ato shkojnë sipas planit që kanë caktu, mësimdhënësi. Kanë lojëra të ndryshme. Poashtu te cikli i lartë, i kemi formuar klubet ku mësimdhënësit e ciklit të lartë vazhdojnë tute më pas edhe në orën 7 dhe 8. Pra, orari mësimorë është 8:30 dhe mbaron në orën 15:20”, tha ajo.
Ajo thekson se një pjesë e pajisjeve ende mungojnë.
“Tek materialet që ende një pjesë janë sjellë, një pjesë pritet shumë shpejt të sjellën. Për shembull janë mjetet didaktike, ulëset, televizorët statike por ato shumë shpejt vijnë”, tha ajo.
Përveç Barilevës, në fazën e dytë të këtij projekti janë përfshirë edhe gjashtë shkolla të tjera, pesë prej të cilave në fshatrat e komunës së Prishtinës. Aktualisht, janë gjithsej 12 shkolla që zhvillojnë mësim tërëditor.
