Sindikata e Bashkuar e Arsimit, Shkencës dhe Kulturës, në bashkëpunim me Qendrën Amerikane të Solidaritetit “Solidary Center” këtë fundjavë ka organizuar punëtorinë dyditore me temë “Mësuesit si lider për të forcuar sindikatat dhe për të përmirësuar arsimin”.
Në seminarin ku po marrin pjesë përfaqësues të sindikatave të arsimit nga Kosova dhe rajoni, hapjen e bëri kryetari i SBASHK-ut, Rrahman Jasharaj, i cili e përshëndeti këtë tryezë duke e falënderuar Qendrën Amerikane të Solidaritetit për mbështetje si dhe pjesëmarrësit tjerë për kontributin e tyre gjatë punëtorisë dyditore.
Në punëtorinë dyditore po marrin pjesë edhe përfaqësuesit e sindikatave të Arsimit të Shqipërisë, Malit të Zi dhe Maqedonisë së Veriut që do t’i paraqesin përvojat e tyre nga këto shtete në lidhje me temat e kësaj punëtorie.
Sipas njoftimit të SBASHK-ut, kryetari i BSPK-së, Atdhe Hykolli, presidenti i Federatës së Sindikatave të Arsimit dhe Shkencës të Shqipërisë (FSASH), Shpëtim Brahaj, presidenti Sindikatës së Pavarur të Arsimit të Shqipërisë (SFASH), Nevrus Kaptelli, kryetarja e Bordit Korunal të Tuzit, Mali i Zi, Albana Lulanaj, Marina Dedvukaj nga Organizata Sindikale e Shkollave të Mesme nga Mali i Zi, Tafa Ahmeti, nënkryetar i Sindikatës së Arsimit, Shkencës e Kulturës të Maqedonisë së Veriut (SNOK) dhe Zanafer Baimak, përfaqësues rajonal i Sindikatës së Arsimit, Shkencës e Kulturës të Maqedonisë së Veriut (SNOK), kanë diskutuar lidhur me gjendjen e mësimdhënësve në vendet respektive, derisa të gjithë kanë shprehur nevojën e funksionimit dhe thellimit të dialogut social në mes të institucioneve dhe përfaqësuesve të punonjësve arsimor.
Ndërsa seanca e parë e seminarit me temën “Aftësi lidershipi për forcimin e sindikatave” u mbajt nga Visar Ymeri, Drejtor Ekzekutiv i Institutit për Politika Sociale “Musine Kokalari”.
Punëtoria dyditore e cila ka për qëllim që mësuesit si liderë të forcojnë sindikatat dhe të përmirësojnë arsimin në vendet pjesëmarrëse të rajonit, vazhdon edhe në ditën e diel me tri seanca të diskutimit dhe përmbylljen e punimeve.
