Forcat ajrore polake dhe ato aleate u vendosën në një “operacion parandalues” në hapësirën ajrore polake të shtunën për shkak të kërcënimit të sulmeve me dronë në zonat fqinje të Ukrainës, ndërsa aeroporti në qytetin lindor polak të Lublinit u mbyll, thanë autoritetet.
Presidenti polak Donald Tusk gjithashtu foli hapur.
“Për shkak të kërcënimit të dronëve rusë që veprojnë mbi Ukrainën pranë kufirit polak, avionë polakë dhe aleatë janë vendosur në hapësirën ajrore polake si një masë parandaluese. Sistemet e mbrojtjes ajrore tokësore janë vendosur në gatishmërinë më të lartë”, tha Tusk.
Alarmi erdhi pasi disa dronë rusë hynë në hapësirën ajrore polake të mërkurën, duke bërë që NATO të dërgonte avionë luftarakë për t’i rrëzuar ata, duke nënvizuar shqetësimet e hershme në lidhje me përhapjen e mundshme të luftës më shumë se trevjeçare të Rusisë në Ukrainë.
Paralajmërime për banorët dhe sirenat
Banorët e disa rretheve në rajonin e Lublinit kanë marrë një paralajmërim urgjent nga Qendra e Sigurisë Qeveritare (RCB) për një kërcënim të mundshëm ajror. “Ekziston rreziku i një sulmi ajror. Kini kujdes të veçantë dhe ndiqni udhëzimet e shërbimeve. Prisni njoftime të mëtejshme”, thuhet në paralajmërimin e dërguar banorëve të disa rretheve.
Sipas informacioneve të fundit, sirenat kanë rënë në qytetin Świdnik, gjë që konfirmon më tej seriozitetin e situatës.
Kjo masë sigurie vjen në një kohë kur Rusia dhe Bjellorusia po kryejnë stërvitje ushtarake Zapad-2025 dhe është vërejtur një aktivitet i shtuar ushtarak në kufijtë rusë dhe bjellorusë.
Masa të shtuara sigurie pas incidentit me dronët rusë
Ky hap parandalues nga autoritetet polake vjen si një reagim i drejtpërdrejtë ndaj incidentit të fundit kur dronët rusë shkelën hapësirën ajrore polake, gjë që ngriti shqetësime serioze për sigurinë e anëtarit të NATO-s që kufizohet me Ukrainën.
Mbyllja e aeroportit në Lublin, një qytet i vendosur relativisht afër kufirit ukrainas, tregon më tej seriozitetin e situatës dhe gatishmërinë e autoriteteve polake për të marrë të gjitha masat e nevojshme për të mbrojtur territorin dhe qytetarët e tyre nga kërcënimet e mundshme.
