residenti i SHBA-së, Donald Trump, shtroi një darkë për Kryeministrin e Katarit në Nju Jork të premten në mbrëmje , disa ditë pasi Izraeli , një aleat i SHBA-së, sulmoi udhëheqësit e Hamasit në kryeqytetin e vendit arab, Doha.
Izraeli u përpoq të vriste udhëheqësit politikë të Hamasit në një sulm në Doha të martën, një goditje që kërcënon të prishë përpjekjet e mbështetura nga SHBA-të për të ndërmjetësuar një armëpushim midis Izraelit dhe Hamasit në Rripin e Gazës. Sulmi izraelit u dënua nga vendet e Lindjes së Mesme dhe vende të tjera, duke thënë se mund të përshkallëzojë tensionet në rajon.
Trump shprehu mosmiratimin e tij për sulmin në një telefonatë me kryeministrin izraelit Benjamin Netanyahu dhe u përpoq t’i siguronte udhëheqësit e Katarit se nuk do të kishte më sulme të tilla.
Në takimin midis republikanit dhe kryeministrit të Katarit, Sheikh Mohammed bin Abdulrahman al-Thani, mori pjesë edhe i dërguari special i SHBA-së, Steve Witkoff .
Një burim i informuar mbi takimin tha se të dy udhëheqësit diskutuan të ardhmen e Katarit si ndërmjetës dhe bashkëpunimin e tij në mbrojtje me Shtetet e Bashkuara pas sulmeve izraelite. Trump tha se ishte i pakënaqur me sulmin ajror izraelit, të cilin e quajti një veprim të njëanshëm që nuk avancoi interesat amerikane ose izraelite.
Uashingtoni mbështetet te Katari, një aleat i fortë në Gjirin Persik. Doha po luan gjithashtu rolin e ndërmjetësit kryesor në negociatat për të arritur një armëpushim midis Izraelit dhe Hamasit dhe për lirimin e pengjeve izraelite të mbajtura nga organizata palestineze.
