Kryetari i Gjykatës Kushtetuese të Kosovës, Nexhmi Rexhepi, ka qëndruar për vizitë zyrtare në Hagë me ftesë të Gjykatës Supreme të Holandës.
Gjykata Kushtetuese ka bërë të ditur se Rexhepi që u ftua nga kryetarja e Gjykatës Supreme të Holandës, Dineke de Groot, për të marrë pjesë në simpoziumin e organizuar në shënim të 75-vjetorit të miratimit të Konventës Evropiane për Drejtat e Njeriut, ishte folësi kryesor.
“Duke iu adresuar audiencës në cilësinë e folësit kryesor, Kryetari Rexhepi mbajti një prezantim mbi rëndësinë e Konventës Evropiane për Drejtat e Njeriut në zhvillimin e demokracisë dhe forcimin e sundimit të ligjit në kontinentin evropian, si dhe për zbatimin e saj në Republikën e Kosovës, ndonëse nuk është palë nënshkruese e Konventës”, thuhet në njoftimin e Gjykatës Kushtetuese për vizitën që kryegjykatësi Rexhepi, ka pasur atje.
Ndër të tjera, bëhet e ditur se ai në këtë simpozium ka folur edhe për respektimin e Konventës në çdo vendim të Gjykatës Kushtetuese të Republikës së Kosovës, në mbrojtje dhe respektim të të drejtave dhe lirive themelore të njeriut.
