Komuna e Klinës ishte ndalesa e radhës e Partisë Demokratike të Kosovës në kuadër të fushatës elektorale për zgjedhjet lokale.
Në fshatin Gllarevë, para përkrahësve të PDK-së, kryetari i kësaj partie, Memli Krasniqi, ftoi qytetarët që t’i japin mbështetje kandidatit të Partisë Demokratike për kryetar të Klinës, Sokol Bashota.
Krasniqi u shpreh i bindur se më 12 tetor Klina do ta rikthejë në krye të komunës Sokol Bashotën, duke e cilësuar atë si njeri të punës dhe të veprave.
“PO për një arsim më të mirë, PO për një shëndetësi më cilësore, PO për një infrastrukturë që ua lehtëson jetën qytetarëve, PO për një bujqësi më të zhvilluar dhe PO për një perspektivë më të mirë për të rinjtë e këtij vendi…”, theksoi mes tjerash kreu i PDK-së.
Kandidati për kryetar të Klinës, Sokol Bashota, tha se prioritet i qeverisjes së tij do të jetë përmirësimi i mirëqenies së banorëve të gjithë komunës, me theks të veçantë pjesëmarrjen e grave në vendimmarrje.
Duke ftuar banorët e Gllarevës që ta mbështesin me votë, Bashota theksoi se projektet zhvillimore për Klinën do të bëhen realitet.
