Pas një telefonate me Donald Trump, Ursula von der Leyen tha se BE po përgatit paketën e 19-të të sanksioneve kundër Rusisë, duke synuar kriptovalutat, bankat dhe energjinë.
“Pata një bisedë të mirë me Presidentin e SHBA-së për forcimin e përpjekjeve tona të përbashkëta për të rritur presionin ekonomik mbi Rusinë përmes masave shtesë”, shkroi von der Leyen në X.
Ajo konfirmoi se Komisioni Evropian “së shpejti do të paraqesë paketën e 19-të të sanksioneve, duke synuar kriptovalutat, bankat dhe energjinë”.
“Ekonomia e luftës e Rusisë, e mbështetur nga të ardhurat nga lëndët djegëse fosile, po financon gjakderdhjen në Ukrainë”, shtoi ajo.
“Për t’i dhënë fund kësaj, Komisioni do të propozojë përshpejtimin e heqjes graduale të importeve të lëndëve fosile ruse”, tha von der Leyen.
“Kjo mund të nënkuptojë një përpjekje për të shtuar disa propozime të rëndësishme në paketë”, tha Vlasiuk.
Politico raportoi më herët të martën se paketa, fillimisht e planifikuar për 17 shtator, u hoq nga axhenda e përfaqësuesve të përhershëm të BE-së.
Informacioni iu komunikua kryeqyteteve vonë pasditen e së hënës, pa detaje se kur do të zbulohej paketa. Një zëdhënës i Komisionit Evropian nuk pranoi të komentonte.
Sipas burimeve të cituara nga botimi, vonesa vjen mes presionit nga Presidenti i SHBA-së Donald Trump, i cili u ka kërkuar vendeve të NATO-s të ndalojnë blerjen e naftës ruse.
Hungaria dhe Sllovakia mbeten blerësit kryesorë të naftës ruse nga brenda BE-së dhe ende nuk i kanë ndaluar blerjet. Diplomatët evropianë thanë se Trump duhet të ndikojë drejtpërdrejt në të dy vendet për shkak të lidhjeve të ngushta me udhëheqësit e tyre.
