Ambasada e Republikës së Shqipërisë në Kosovë do të hapë sonte aktivitetin kulturor “Netët e Filmit Shqiptar”, një ngjarje e cila do të sjellë para publikut kryevepra të kinemasë shqiptare.
Ceremonia e hapjes do të zhvillohet në Kino Armata, duke filluar nga ora 19:00, dhe do të çelet me shfaqjen e filmit artistik të regjisorit të madh shqiptar, tashmë i ndjerë, Dhimitër Anagnosti – “Përrallë nga e Kaluara”, njofton kjo ambasadë.
Aktiviteti, i cili do të zgjasë nga shtatori deri në nëntor 2025, organizohet nga Ambasada e Shqipërisë në bashkëpunim me Arkivin Qendror Shtetëror të Filmit dhe Kino Armata. Gjatë kësaj periudhe do të shfaqen filma të autorëve më të njohur të kinematografisë shqiptare, si Xhanfise Keko, Saimir Kumbaro, Fehmi Hoshafi dhe Muharrem Fejzo, për nxënësit e shkollave dhe publikun filmdashës, thuhet në njoftim.
Hyrja në shfaqje është falas, por vendet janë të limituara.
Ky aktivitet konsiderohet një mundësi e veçantë për të njohur më nga afër trashëgiminë kinematografike shqiptare dhe për të promovuar kulturën kombëtare në Kosovë.
