Lidhja Demokratike e Kosovës ka hapur fushatën zgjedhore në Junik, ku theksoi se kjo komunë gjithmonë ka ditur të zgjedhë me zemër dhe me besim tek LDK.
Kryetari i partisë, Lumir Abdixhiku, tha se Juniku nuk është më qytet i harruar, por një qytet që rrezaton falë udhëheqjes së kryetarit aktual, Ruzhdi Shehu.
“Ne nuk jemi këtu për të thënë se gjithçka është bërë. Jo. Ne jemi këtu për të thënë se kjo është vetëm gjysma e rrugës. Qeverisja është maratonë, jo garë e shpejtë. Maratona e Junikut duhet të vazhdojë. Për katër vitet e ardhshme, Ruzhdi Shehu dhe LDK kanë vizion të qartë për Junikun”, tha Abdixhiku.
Ndërkohë, kandidati i LDK-së për një mandat të ri në krye të komunës, Ruzhdi Shehu, theksoi se tubimi është konfirmim i pranimit të punës së përbashkët dhe dëshirës që Juniku të vazhdojë të transformohet.
“Jam krenar para jush se me përkushtim i kam realizuar premtimet dhe kam qeverisur pa asnjë skandal. Së bashku do ta bëjmë Junikun qytetin që meriton. Në katër vitet e ardhshme do të ndërtojmë sheshin, rrjetin e energjisë në bjeshkë, shtratin e lumit Erenik, fushën e sportit, këndin e lojërave dhe pishinën gjysmë-olimpike”, tha Shehu.
Lista e kandidatëve të LDK-së në Junik, e udhëhequr nga Ruzhdi Shehu, përbëhet nga 16 kandidatë për asamblenë komunale.
