Masa e udhëhequr nga demokratët nuk ka gjasa të kalojë në Dhomën e Përfaqësuesve, ku republikanët e Presidentit Donald Trump kanë shumicën 53-47.
Trump tha të enjten se nuk pajtohet me kryeministrin britanik Keir Starmer nëse duhet të njihet një shtet palestinez dhe se asnjë republikan nuk i është bashkuar përpjekjes për ta bërë këtë.
Demokrati i Oregonit, Jeff Merkley, i cili po drejton iniciativën, tha:
“Amerika ka përgjegjësinë për të udhëhequr dhe është koha për të vepruar.”
Rezoluta bën thirrje për njohjen nga SHBA-të të një shteti palestinez të demilitarizuar së bashku me një Izrael të sigurt dhe do t’u ofronte të dyja palëve shpresë, duke rritur njëkohësisht perspektivat për paqe, tha Merkley.
Në Dhomën e Përfaqësuesve, Ro Khanna e Kalifornisë po qarkullon një letër me shpresën e mbledhjes së mbështetjes për njohjen e shtetësisë palestineze.
Bashkënënshkrues të tjerë të rezolutës së Senatit janë demokratët Chris Van Hollen nga Merilend, Tim Kaine nga Virxhinia, Peter Welch nga Vermonti, Tina Smith nga Minesota, Tammy Baldwin nga Uiskonsini dhe Mazie Hirono nga Havai, si dhe Bernie Sanders nga Vermonti, një kandidat i pavarur.
Të mërkurën, Sanders u bë senatori i parë amerikan që i përshkroi ngjarjet në Gaza si gjenocid.
Një komision hetimor i Kombeve të Bashkuara arriti në përfundimin këtë javë se Izraeli kreu gjenocid në Gaza. Izraeli tha se gjetjet ishin të anshme dhe të bazuara në prova të paverifikuara.
Disa aleatë të SHBA-së po përgatiten të njohin shtetin palestinez, ndërsa udhëheqësit botërorë takohen në Asamblenë e Përgjithshme të OKB-së në Nju Jork javën e ardhshme.
Një sondazh i Reuters/Ipsos muajin e kaluar zbuloi se shumica e amerikanëve – 58 përqind – besojnë se çdo vend në Kombet e Bashkuara duhet ta njohë Palestinën si komb.
Numri i viktimave palestineze të luftës tejkaloi 65,000 të mërkurën, sipas autoriteteve shëndetësore të Gazës. Sipas të dhënave izraelite, në sulmin e Hamasit më 7 tetor 2023, i cili shkaktoi luftën, u vranë rreth 1,200 persona dhe u morën peng 251 persona.
