Ndryshimet në Prishtinë, sipas kryetarit të LDK-së, Lumir Abdixhiku, janë evidente. Prandaj, në takim me banorët e degës së tretë të kësaj partie në kryeqytet, ai kërkoi votën për një mandat të dytë për kryetarin aktual, Përparim Rama.

“Në Prishtinë e kthyem projektin e unazës së brendshme, korridorin që lidh Prishtinën me gjithë ekonomin e Kosovës, në hapësirat publike që Qeverisja e LDK-së dhe Përparimit i dha kryeqytetit frymë të re. U hapën sheshe, u krijuan parqe, u nisën ishuj urban, u gjallëruan aktivitete kulturore. Kryeqyteti mori fytyrë moderne. Ky proces do të vazhdoj sepse qytetarët tanë meritojnë një qytet ku jetohet me dinjitet”, tha Abdixhiku.

Kandidati i LDK-së për kryetar të Prishtinës, Përparim Rama, prezantoi projektet e realizuara gjatë mandatit të kaluar, me premtimin për realizim projektesh të tjera, si funksionalizimin e mësimit tërë ditor e zgjidhje për trafikun urban.

“Kemi me fillua me 5 shkolla para një vitit tani kemi vazhdua edhe me 7 shkolla tjera, pra i kemi 12. Në katër vite e ardhshme do të bëhen të gjitha shkollat me mësim tërë-ditor. Po investojmë në kurikulën digjitale i mundëson fëmijët tanë”, tha ai

“Unë nesër, kur te rregulloj krejt sheshin George Bush, i themi hajde po e hapim dhe e shihni që nuk e rregullon trafikun. Çka e rregullon trafikun? Trafikun e rregullon Unaza e Kryeqytetit të  cilën e kemi pas gati para 3 viteve. Trafikun e zhbllokon unaza e brendshme që edhe 2 javë do të hapet me siguri jemi duke e shty përpara”, tha Rama.

Në këtë aktivitet, Lidhja Demokratike e Kosovës prezantoi gjithashtu edhe kandidatët për Kuvendin Komunal të Prishtinës.