Sot në moshën 71-vjeçare është ndarë nga jeta aktori, regjisori dhe pedagogu i shquar Enver Petrovci. Kryetari i Kuvendit të Kosovës, Dimal Basha, ka shprehur dhimbjen dhe ngushëllimet për këtë humbje duke thënë se Kosova dhe mbarë arti shqiptar sot humbën një nga figurat më të shquara të kulturës.
“Me dhimbje të thellë pranova lajmin për largimin në amshim të aktorit të mirënjohur, Enver Petrovci. Kosova dhe mbarë arti shqiptar sot humbën një nga figurat më të shquara të kulturës sonë”, ka shkruar Basha në një postim në Facebook.
Ai theksoi se Petrovci ishte dhe do të mbetet një prej ikonave të spikatura të skenës dhe ekranit shqiptar, një aktor me shpirt të madh, me talent të rrallë dhe me një trashëgimi të pasur artistike që do të jetojë ndër breza.
“Enver Petrovci i dha jetë qindra personazheve, por mbi të gjitha i dha frymë teatrit, kinematografisë dhe artit tonë kombëtar, duke lënë gjurmë të pashlyeshme në kujtesën tonë popullore”, shtoi ai.
Në emër të Kuvendit të Republikës së Kosovës, kryetari Basha shprehu ngushëllimet më të sinqerta për familjen Petrovci, miqtë, kolegët, dashamirët e artit dhe mbarë komunitetin artistik.
