Një tentativë për të futur mallra në territorin e Kosovës pa i deklaruar në doganë është zbuluar në orët e para të mëngjesit të sotëm në pikën kufitare Merdarë.
Sipas njoftimit, rreth orës 03:00, njësitet doganore ndaluan për kontroll një kamion transportues, i cili ishte përzgjedhur për kontroll të detajuar.
“Gjatë intervistimit, shoferi i mjetit ka deklaruar se nuk kishte asgjë për të raportuar në doganë. Por, pas një inspektimi më të thelluar, zyrtarët doganorë gjetën në ulësen e parë të automjetit një çantë që përmbante pajisje dentare, si dhe në bagazh u zbuluan pjesë rezervë për automjete, ka njoftuar Dogana e Kosovës.
Të gjitha mallrat e gjetura janë ndaluar përkohësisht, ndërsa ndaj rastit është iniciuar procedurë për kundërvajtje doganore, në bazë të nenit 244 të Kodit Doganor dhe të Akcizave të Kosovës (KDAK).
Dogana rithekson se do të vazhdojë të veprojë me përgjegjësi dhe profesionalizëm për të garantuar zbatim të ligjit dhe siguri në pikat kufitare, me qëllim të mbrojtjes së interesave të shtetit dhe qytetarëve të Kosovës.
