Prokuroria Themelore në Prizren ka ngritur aktakuzë kundër të pandehurit Sh.H., i cili gjendet nën masën e paraburgimit që nga 23 qershori 2025, për shkak të dyshimeve të bazuara se ka kryer veprat penale “Vjedhje e rëndë” dhe “Vjedhje e rëndë e mbetur në tentativë”, sipas Kodit Penal të Republikës së Kosovës (KPRK).
Sipas aktakuzës, më 12 janar 2025, rreth orës 03:40 të mëngjesit, i pandehuri Sh.H. nga fshati Greme, Komuna e Ferizajt, në bashkëkryerje me shtetasin bullgar V.G., kanë kryer një grabitje të organizuar në argjendarinë “G” në Prizren.
“Të maskuar dhe të pajisur me mjete të përshtatshme për vjedhje, ata kanë çaktivizuar sistemin e alarmit dhe kanë depërtuar me forcë në lokal, duke marrë rreth 3 kg ari 14 karatësh, një pesë-lirësh, dy lira floriri, disa hallka dore, një kilogram argjend dhe një peshore. Vlera e përgjithshme e dëmit të shkaktuar është vlerësuar në rreth 195,000 euro. Pas kryerjes së veprës penale, të dy të pandehurit janë kthyer në Ferizaj, në shtëpinë e Sh.H”, thuhet në njoftim.
Sipas njoftimit, po atë natë, të pandehurit kanë tentuar të kryejnë edhe një grabitje tjetër në argjendarinë “S.G.” në Prizren. Ata kanë hyrë me forcë në objekt, por nuk kanë arritur të hapin kasafortën dhe më pas janë larguar nga vendi i ngjarjes. Ky veprim është kualifikuar si “Vjedhje e rëndë e mbetur në tentativë”.
Ndërkohë, më 23 janar 2025, në rrugën “Mbreti Pirro” në Prizren, Sh.H. dyshohet se ka depërtuar me forcë në një objekt privat, duke thyer xhamin dhe duke marrë një modem interneti, një pajisje DVR dhe duke dëmtuar sistemin e kamerave të sigurisë, duke kryer një tjetër vepër penale të “Vjedhjes së rëndë”.
Me ngritjen e aktakuzës, prokurori i çështjes ka propozuar që gjykata të konfiskojë pasuritë dhe mjetet e dyshuara si të përfituara nga veprimtaria kriminale, përfshirë një apartament prej 117 m² në Ferizaj, një automjet Renault Megane (ngjyrë e kaltër), një BMW/1K4 (ngjyrë e zezë), një BMW/Z3 (ngjyrë e zezë), një traktor STELS/650-ST, dhe një automjet Peugeot 308.
Prokuroria ka kërkuar nga gjykata që, pas administrimit të provave dhe mbajtjes së shqyrtimit gjyqësor, i pandehuri të shpallet fajtor për veprat penale për të cilat akuzohet dhe të dënohet në përputhje me ligjin në fuqi.
