Lidhja Demokratike e Kosovës ka shpalosur programin qeverisës për Podujevën me kryetar Ekrem Hysenin. LDK është zotuar se do realizoj projekte jetike për qytetarët, përfshirë këtu do të zgjidh problemet me ujë të pijes e do të punoj në zhvillimin e qendrave kryesore tradicionale.
Zgjidhje për problemet e banorëve të Podujevës ka premtuar Lidhja Demokratike e Kosovës me kandidatin e kësaj komune për kryetar, Ekrem Hysenin.
Hyseni i shoqëruar nga i pari i LDK-së, Lumir Abdixhiku, u ka kërkuar qytetarëve votën duke u zotuar se premtimet e tyre do të realizohen.
Ndërsa Abdixhiku tha se me LDK-në në krye, Podujevës do t’i kthehet dinjiteti e zhvillimi.
“Llapi nuk fal më. Koha e tyre ka mbaruar. Podujeva nuk meriton propagandë, fjalë e mashtrime, por meriton punë, zhvillim e respekt. Podujeva meriton dinjitet. Dhe këtë dinjitet, këtë zhvillim, këtë shpresë ia sjell vetëm LDK, njeri ynë e i juaji, Ekrem Hyseni”, tha Lumir Abdixhiku, kryetar i LDK-së.
Ndërsa Hyseni u premtoi qytetarëve se do të zgjidh problemet me furnizim me ujë të pijes, eliminimin e ujërave të zeza e do të punoj për zhvillimin e qendrave kryesore tradicionale.
“Llapi nuk duron. Llapi ka dinjitetin dhe krenarinë, kurrë për asgjë nuk e jep atë. 12 tetori nuk është garë për komunën, është kthesa e madhe që kthen Podujevën dhe Kosovën. Tre prioritetet kryesore janë: Furnizimi me ujë të pijes, eliminimi i ujërave të zeza zhvillimi i qendrave kryesore tradicionale”, tha Ekrem Hyseni, kandidat i LDK-së për kryetar të Podujevës.
LDK tha se më 12 tetor do të ndodhë kthesa e madhe në Podujevë e gjithë Kosovën.
