Kryetari i Kuvendit të Kosovës, Dimal Basha, ka thënë se me kërkesën e tij, është larguar kapitulli që ai kishte shkruar dhe i është hequr emri nga autorësia në një punim të vitit 2012 që fliste kundër Ushtrisë Çlirimtare të Kosovës.
Në njoftimin e publikuar në Facebook, Basha thotë se ka bërë kërkesë që kapitulli 3 të fshihet nga ai publikim.
“Dua t’ju informoj se me t’u vënë në dijeni që një punim i imi nga studimet para 13 viteve ishte përfshirë si kapitull i veçantë në kuadër të një publikimi më të gjerë, në të cilin gabimisht isha listuar si bashkë-autor, unë kam bërë kërkesë tek Revista në fjalë që pjesa që kam kontribuar unë, pra Kapitulli 3, të hiqet tërësisht nga ai publikim!”, ka shkruar Basha në rrjete sociale.
Ai ka njoftuar se Komiteti i Publikimeve i revistës ia ka miratuar kërkesën.
“Komiteti i Publikimeve i Revistës në fjalë sot më ka njoftuar që ka miratuar kërkesën time për tërheqjen e Kapitullit 3 nga publikimi, dhe gjithashtu ka hequr edhe emrin tim nga autorësia, meqenëse unë nuk kam autorësi në pjesën tjetër të publikimit, përveç Kapitullit 3 i cili tashmë është tërhequr. Ju falënderoj për mirëkuptimin!”, ka shkruar tutje Basha.
Raportimi për këtë punim, ku Basha dhe Jana Arsovska ishin si bashkautor mxiti reagime të shumta në Kosovë, ndërsa Organizata e Veteranëve të Ushtrisë Çlirimtare të Kosovës kishte kërkuar që Basha të shkarkohet nga posti i kryeparlamentarit.
