Ekonomia dhe arsimi janë dy çështjet kryesore në fokus të Bashkim Budakovës, kandidatit të Aleancës për Ardhmërinë e Kosovës (AAK) për kryetar të Lipjanit. Në takimin elektoral të mbajtur sot në këtë qytet, në prani të kryetarit të partisë, Ramush Haradinaj, u theksua se edhe sigurimi i ujit të pijshëm, por edhe trajtimi i ujërave të zeza, janë projekte që do të realizohen gjatë mandatit të ardhshëm.
Fushatën elektorale, në ditën e trembëdhjetë të saj, Aleanca për Ardhmërinë e Kosovës e vazhdoi sot në Lipjan. Kryetari i partisë, Ramush Haradinaj, në takim me qytetarët, kërkoi që duke i dhënë besimin Bashkim Budakovës për kryetar komune, ata njëkohësisht të japin mbështetje edhe planprogramit për ndryshim që ai ofron. Ai rikujtoi rëndësinë e qeverisjes komunale si derën e parë të ankesave të qytetarëve.
“Megjithatë, në këtë takim me elektoratin e Lipjanit, theksova rëndësinë e projekteve që ofron kandidati i kësaj partie për kryetar komune”, tha Ramush Haradinaj, kryetar i AAK-së.
Në planprogramin e tij, Bashkim Budakova theksoi se përparësi do t’i jepet ekonomisë dhe arsimit:
“Platforma programore qeverisëse për katër vitet e ardhshme është e fokusuar në të mirën publike. Qëllimi ynë është të përmirësojmë shërbimet për qytetarët, duke i dhënë prioritet zhvillimit ekonomik dhe arsimit, si dhe trajtimit të ujërave të zeza dhe sigurimit të ujit të pijshëm për komunitetin”, tha ndërkaq Bashkim Budakova, kandidat për kryetar të Lipjanit.
Në fund të këtij tubimi elektoral, u dorëzuan edhe konfirmimet zyrtare për kandidatët për Kuvendin Komunal të Lipjanit, duke shënuar një hap tjetër drejt zgjedhjeve lokale.
