Tre kamionë me tabela reklamuese kundër Kosovës dhe kryeministrit në detyrë Albin Kurti po qarkullojnë këto ditë në rrugët jashtë selisë së Kombeve të Bashkuara në New York, aty ku po mbahen seancat e Asamblesë së Përgjithshme.
Ky është një organizim i diasporës serbe në SHBA, me qëllim të tërheqjes së vëmendjes për gjendjen e vështirë në të cilën jetojnë serbët në Kosovë, raportohet në mediat në Serbi.
Në emër të diasporës serbe që organizoi këtë aksion, Alek Mitroviq theksoi se ata dëshirojnë të tërheqin vëmendjen për një situatë që vazhdon prej shumë kohësh.
Sipas tij, kjo është hera e dytë që organizohet një aksion i tillë, i cili synon të zgjojë vetëdijen e amerikanëve dhe të komunitetit ndërkombëtar lidhur me të gjitha ato që, siç thotë ai, përjeton popullsia serbe në Kosovë, raportohet në mediat serbe.
Mitroviq tha se amerikanët “nuk janë mjaft të informuar për situatën dhe kushtet e vështira në të cilat jetojnë serbët në Kosovë.”
Me këtë aksion, ai shpreson të kontribuojë që të mos harrohet pozita e vështirë e serbëve në Kosovë.
