Kandidati i Partisë Guxo, Lëvizjes Vetëvendosje dhe Alternativës për kryetar të Mitrovicës së Jugut, Faton Peci, mbajti sot një tubim elektoral në shkollën “Andon Zako Çajupi”.
I shoqëruar nga kryetari i Mitrovicës së Veriut, Erden Atiq, Peci theksoi se projektet e tij do të jenë të prekshme dhe nuk do të mbesin vetëm premtime. Ai u zotua për transparencë në qeverisje, duke theksuar se do të punojë me përkushtim, njësoj si në kohën kur ka ushtruar funksionin e ministrit.
Para përkrahësve, Peci tha se Mitrovica ka nevojë për një zhvillim të qëndrueshëm dhe për rikthimin e emrit e traditës së saj. Ai tregoi se rruga e tij politike nuk ka qenë e lehtë, por se në menaxhimin institucional është dëshmuar i suksesshëm.
“Mitrovica do të ketë zhvillim. Na duhet përkrahja e madhe. Propaganda është e dytë, por dojnë suksesin e sovranitetin ta shkatërrojnë. Na duhet mbështetja e juaj për dy ndërmarrje të reja – një për transport publik dhe një për ndërmarrje banesore. Hapësirat publike do të kenë menaxhim. Ndërtimet e kundërligjshme do të marrin fund me 12 tetor”, tha ai.
Peci shtoi se me mbështetjen e elektoratit, do të zbatohen projekte konkrete, përfshirë edhe trajtimin e ujërave të zeza me impiant modern.
Kandidati i LVV-së u zotua se si kryetar i ardhshëm i komunës do të jetë gjithmonë i qasshëm për qytetarët:
“Një ditë në javë do të jem i hapur për çdo qytetar. Një herë në javë do të shkoj nëpër ministri. Jemi qytet i njerëzve minatorë, na e kanë vështirësuar jetën problemet e pasluftës. Që Mitrovica të mos mbetet e fundit – sepse ka nivelin më të ulët të përfshirjes në parashkollor – duhet të punojmë të gjithë”, tha Peci.
Në këtë tubim mori pjesë edhe kryetari i Mitrovicës së Veriut, Erden Atiq, i cili deklaroi mbështetje të plotë për kandidatin Peci.
“E tërë Lëvizja Vetëvendosje qëndron prapa kandidatit për kryetar të Mitrovicës së Jugut. Me Pecin si kryetar, jeta e qytetarëve do të jetë më e mirë”, tha Atiqi.
Gjithashtu, kandidati për Kuvend Komunal nga Partia Guxo, Visar Syla, premtoi angazhim për realizimin e projekteve që ndërlidhen me mirëqenien e qytetarëve, si në jug ashtu edhe në veri të Mitrovicës.
