Presidenti i SHBA-së, Donald Trump, i bëri thirrje Turqisë që të ndalojë blerjen e naftës nga Rusia, raporton sot BBC.
Trump i tha Presidentit turk Rexhep Tajip Erdogan në Shtëpinë e Bardhë se ndërprerja e importeve do të ishte “gjëja më e mirë” që mund të bënte Ankaraja. Takimi në Zyrën Ovale përfundoi pa një zgjidhje për çështjen e sanksioneve të SHBA-së kundër Turqisë apo shitjen e avionëve luftarakë të përparuar F-35, por Trump shprehu optimizëm.
Turqia nuk ka mundur të blejë avionë amerikanë F-35 për vite me radhë. Trump vendosi sanksione ndaj Turqisë në vitin 2020 për blerjen e sistemeve ruse të mbrojtjes ajrore S-400, dhe një vit më parë, ajo u përjashtua nga një program që prodhonte pjesë për avionët.
Trump: Si Putini ashtu edhe Zelenski e respektojnë Erdoganin
Gjatë deklaratave të shkurtra për mediat sot, Trump tha se donte që Turqia “të mos blejë asnjë naftë nga Rusia ndërsa ajo vazhdon sulmet e saj në Ukrainë”.
“Gjëja më e mirë që mund të bëjnë është të mos blejnë naftë dhe gaz nga Rusia”, tha Trump. Turqia është një nga blerësit më të mëdhenj të produkteve energjetike ruse, së bashku me Indinë dhe Kinën.
Trump shtoi se beson që Erdogan respektohet si nga Presidenti ukrainas Volodymyr Zelensky ashtu edhe nga Presidenti rus Vladimir Putin, që do të thotë se ai mund të ketë një “ndikim të madh” në luftë “nëse dëshiron”, shkruan BBC.
