Lidhja Demokratike e Kosovës ka mbajtur një tubim zgjedhor në Fushë Kosovë, ku theksoi rëndësinë e vazhdimit të qeverisjes së saj në këtë komunë. Kryetari i partisë, Lumir Abdixhiku, dhe kandidati për kryetar të komunës, Besnik Osmani, prezantuan vizionin dhe prioritetet e tyre për zhvillimin e mëtejshëm të qytetit.
LDK thotë se Fushë Kosova është zemra e Lidhjes Demokratike të Kosovës dhe, sipas kësaj partie, qeverisja e saj në këtë komunë ka dëshmuar përparim dhe zhvillim.
“Në një Fushë Kosovë që po rritet dhe zhvillohet me shpejtësi, kërkohen vendime të guximshme për infrastrukturë moderne dhe shërbime cilësore, dhe vetëm përmes qeverisjes së LDK-së mund të garantohet ky zhvillim”. Kështu u tha gjatë tubimit zgjedhor të kësaj partie në Fushë Kosovë.
Kryetari i LDK-së, Lumir Abdixhiku, theksoi rëndësinë e investimeve dhe vazhdimin e qeverisjes në këtë komunë.
“Sonte qëndrojmë në një qytet që është histori suksesi, model i zhvillimit dhe përparimit. Fushë Kosova është tregimi i madh i LDK-së dhe dëshmi se kur qytetarët i japin besim kësaj partie, ai besim shndërrohet në zhvillim dhe transformim. Ky qytet është shembulli ynë i vizionit dhe përkushtimit. Ju jeni dëshmitarë të transformimit urban që ka ndodhur këtu, e që mban vulën e një lideri që shërbeu për 25 vite me radhë – kryetarit legjendar Burim Berisha,” deklaroi ai.
Abdixhiku shtoi se ky model i mirëqeverisjes duhet të vazhdojë në këtë komunë.
“LDK ka vendosur një model të mirë qeverisjeje dhe ky model është trashëgimia që i lihet Fushë Kosovës. Ai duhet të vazhdojë edhe më tutje. Sonte jemi këtu për të falënderuar qytetarët dhe për të dhënë mbështetjen tonë për Besnik Osmanin,” tha Abdixhiku.
Ndërkaq, kandidati për kryetar të Fushë Kosovës nga LDK, Besnik Osmani, prezantoi prioritetet e tij që mbështeten në katër shtylla kryesore, duke theksuar se ato do të realizohen vetëm nëse qytetarët i japin besimin përmes votës.
“Për katër vite kemi paraparë 55 milionë euro investime kapitale në Fushë Kosovë. Programi ynë ka katër shtylla kryesore. Së pari, vizioni për Fushë Kosovën që mbështetet në një tranzicion të së ardhmes. Do të investojmë në objekte moderne që do të shërbejnë si modele për gjeneratat e ardhshme. Po ashtu, në të dy krahët e Fushë Kosovës do të ndërtohen rrugë që lidhen drejtpërdrejt me kryeqytetin, si dhe parkingje nëntokësore,” tha Osmani.
Ai shtoi se qyteti do të ketë sheshin e vet dhe sistemin e ngrohjes qendrore.
“Qyteti do të ketë ngrohje qendrore me ndihmën e qeverisë. Përveç kësaj, Fushë Kosova do të ketë edhe sheshin ‘Nënë Tereza’, një hapësirë që i mungon aktualisht qytetit,” theksoi ai.
Në këtë tubim, LDK prezantoi gjithashtu edhe listën me 34 kandidatë për Asamblenë Komunale të Fushë Kosovës.
