Ministri i Jashtëm rus, Sergei Lavrov, akuzoi NATO-n dhe Bashkimin Evropian se po shfrytëzojnë Ukrainën për të zhvilluar luftë kundër Rusisë.
Lavrov e tha këtë në një takim të ministrave të jashtëm të vendeve të G20 në ndërtesën e OKB-së, vetëm dy ditë pasi Presidenti i SHBA-së Donald Trump tallte aftësitë ushtarake të Rusisë dhe tha se Kievi mund të kthejë të gjithë territorin e tij.
Sekretarja e Jashtme britanike, Yvette Cooper, reagoi ashpër ndaj deklaratave të Lavrovit, duke e kritikuar atë që kishte dalë nga salla ndërsa ajo po fillonte fjalimin e saj.
“E shoh që përfaqësuesi rus po largohet nga vendi i tij sepse nuk dëshiron të dëgjojë një përgjigje për luftën e tij të paligjshme agresive kundër Ukrainës. Le të jemi absolutisht të qartë: ky është një akt agresioni i paprovokuar – një sulm i turpshëm jo vetëm ndaj sigurisë dhe qëndrueshmërisë së Ukrainës, por edhe ndaj parimeve themelore të Kartës së OKB-së, duke përfshirë respektin për sovranitetin dhe integritetin territorial të shteteve. Asnjë sasi fantazish të shtrembëruara, dezinformimi apo propagande nga përfaqësuesi rus nuk mund ta bindë askënd për të kundërtën”, tha Cooper. “
Refuzimi për të respektuar parimet themelore të Kartës së OKB-së tregon ambicie neokoloniale që kontribuojnë në rritjen e paqëndrueshmërisë globale dhe shpërthimin gjithnjë e më të shpeshtë të konflikteve rajonale. Kriza të shumta në Afrikë mbeten të pazgjidhura, shumë prej të cilave datojnë që nga periudha koloniale, kur kufijtë u hartuan në mënyrë arbitrare, pa respekt për trashëgiminë etnike ose fetare. Një shembull i qartë i një qasjeje të tillë është kriza ukrainase, e cila u provokua nga Perëndimi, ndërsa NATO dhe BE e shndërruan atë në një luftë të hapur kundër vendit tim – dhe në territorin e vet”, tha Lavrov.
