Partia pro-ruse “Zemra e Moldavisë” nuk do të marrë pjesë në zgjedhjet parlamentare të kësaj fundjave, pasi Komisioni Qendror i Zgjedhjeve vendosi ta heqë atë nga lista e kandidatëve.
Vendimi u mor pasi gjykata më parë kishte kufizuar aktivitetet e partisë për një vit për shkak të një hetimi për blerje të dyshuar votash, financim të paligjshëm dhe pastrim parash.
Partia: Kjo nuk është drejtësi
Me vendimin e zgjedhjeve, të gjithë anëtarët e Zemrës së Moldavisë u hoqën nga listat e kandidatëve dhe blloku politik të cilit i përkasin ka 24 orë kohë për të plotësuar listën dhe për të përmbushur kërkesat ligjore.
Partia e quajti vendimin të motivuar politikisht. “Kjo nuk është drejtësi, por akti i fundit i një loje të ndyrë që autoritetet e inskenuan paraprakisht me një qëllim – të na heshtnin”, thanë ata.
Zgjedhjet e së dielës shihen si vendimtare për Moldavinë, një ish-republikë sovjetike që është kandidate për anëtarësim në BE nga viti 2022. Partia qeverisëse pro-evropiane e Veprimit dhe Solidaritetit ka një shumicë të fortë që nga viti 2021, por tani përballet me një bllok prej katër partish të tjera pro-ruse, përfshirë Zemrën e Moldavisë, raporton DW .
Zgjedhje të rëndësishme
Autoritetet moldave pretendojnë se Rusia shpenzoi qindra miliona euro për të ndikuar në rezultatin e zgjedhjeve përmes blerjes së votave, një pretendim që Moska e mohon.
Anëtarët e “Zemrës së Moldavisë” ishin subjekt i një kontrolli në fillim të këtij muaji që çoi në akuza për ryshfet votuesish, financim të paligjshëm dhe pastrim parash.
Kryetarja e partisë, Irina Vlah, u sanksionua nga disa shtete anëtare të BE-së këtë javë me dyshimin për ndihmë në ndërhyrjen ruse në zgjedhje. Asaj iu ndalua hyrja në Letoni, Estoni dhe Poloni, ku u akuzua për “ndihmë ndaj Federatës Ruse për të ndërhyrë në përgatitjet për zgjedhjet parlamentare”.
