Ushtruesi i detyrës së Kryeprokurorit të Shtetit, Besim Kelmendi, ka inkurajuar kryeprokurorët dhe prokurorët që t’i japin përparësi procedurës së ndërmjetësimit gjatë trajtimit të rasteve, si një formë alternative efikase dhe praktike për zgjidhjen e tyre.
Deklarata u bë gjatë një ngjarjeje të organizuar nga Gjykata Supreme e Kosovës, me rastin e shënimit të Ditës Ndërkombëtare të Ndërmjetësimit, ku me ftesë të kryetarit të Gjykatës Supreme, Fejzullah Rexhepi, morën pjesë edhe kryeprokurorë të prokurorive të vendit.
Duke folur për rëndësinë e këtij instituti në sistemin gjyqësor, Kelmendi theksoi se ndërmjetësimi është i paraparë me Kodin e Procedurës Penale dhe Ligjin për Ndërmjetësim, dhe se përdorimi i tij sjell përfitime të shumta si për institucionet, ashtu edhe për qytetarët.
“Zgjidhja e rasteve përmes ndërmjetësimit iu mundëson qytetarëve të mos evidentohen si persona të dënuar në evidencat penale. Për më tepër, kjo procedurë ka efekte pozitive, është efikase dhe praktike, sepse kursen kohën dhe zvogëlon shpenzimet për palët në procedurë”, u shpreh Kelmendi.
Në përmbyllje, ai u bëri thirrje kryeprokurorëve, prokurorëve, kryetarëve të gjykatave dhe gjyqtarëve që ta kenë parasysh këtë procedurë dhe t’i japin përparësi, pasi ndërmjetësimi kontribuon në ruajtjen e marrëdhënieve të mira ndërnjerëzore mes palëve të përfshira.
