Lëvizja Vetëvendosje ka mbajtur një tubim elektoral në qytetin e Gjilanit, ku të pranishëm ishin përfaqësues të lartë të partisë, përfshirë edhe kryetarin e Kuvendit të Kosovës, Dimal Basha.
Gjatë fjalës së tij, Basha premtoi përkrahje për Komunën e Gjilanit dhe ftoi qytetarët që ta mbështesin kandidatin për kryetar komune nga radhët e Vetëvendosjes, Alban Hyseni.
“Qeverisjet e kaluara buxhetin e shpenzonin në asfalt. Nëse e shihni ndryshimin e prioriteteve, Gjilani ka gjashtë çerdhe në përfundim. Investimi më i madh që po bëjmë është në shkolla, për të moshuarit – ndërtimi i Shtëpisë së Pleqve, bursa për studentët. Jeni me fat që e keni Alban Hysenin. Prioritetet e Albanit duhet të përfundojnë dhe na duhet të fitojmë pa balotazh”, theksoi Basha.
Kandidati për kryetar të Gjilanit, Alban Hyseni, u zotua për përfundimin e projekteve të nisura si dhe për realizimin e shumë projekteve të reja në mandatin e ardhshëm.
“Do të vazhdojmë të punojmë me nder e dinjitet. Do të punojmë për ndërtimin e infrastrukturës. Kemi ndërtuar gjashtë çerdhe të reja dhe po nisim projekte të tjera. Kemi transformuar hapësirat publike”, theksoi Hyseni.
Ai tha se do të bashkëpunojë ngushtë me këshillat e lagjeve për të identifikuar prioritetet e qytetarëve.
Një kandidat për asamblist nga Vetëvendosje bëri të ditur se gjatë mandatit janë dyfishuar çerdhet, është shtuar numri i asistentëve për fëmijë, janë realizuar investime në infrastrukturë, janë trajnuar mësimdhënësit dhe janë ndarë 250 mijë euro në bursa për studentët.
“Në mandatin e ardhshëm do të ndërtojmë çerdhe të reja, do të ketë mësim gjithëditor, ushqim për nxënës, do të përfundojë shkolla e Mjekësisë dhe do të mbështeten nxënësit dhe mësuesit e dalluar. Kemi nisur një rrugëtim të madh që duhet ta çojmë përpara”, tha ai.
Kandidatët për Kuvendin Komunal të Gjilanit nga Vetëvendosje premtuan më shumë punë dhe angazhim në mandatin e ardhshëm, të cilin synojnë ta fitojnë në zgjedhjet e 12 tetorit.
