Kosova do të përfaqësohet për herë të parë në Konferencën Evropiane të Xhazit (European Jazz Conference), ngjarja më prestigjioze e këtij zhanri në Evropë, me ftesë të veçantë për Mitrovica International Jazz Days.
Ftesa erdhi nga Karolina Juzwa, Presidente e Europe Jazz Network (EJN), rrjet ndërkombëtar që bashkon mbi 180 organizata nga më shumë se 35 vende evropiane, përfshirë festivale, institucione kulturore, qendra të muzikës kreative dhe klube xhazi.
Konferenca, që këtë vit po mbahet në Bari të Italisë nën moton “Somewhere called HOME”, mbledh profesionistë të xhazit nga e gjithë bota: drejtues festivalesh, muzikantë, kuratorë dhe organizatorë, të cilët ndajnë ide dhe zhvillojnë bashkëpunime të reja për të avancuar xhazin si art bashkëkohor.
Pjesëmarrja e Kosovës në këtë platformë përbën një moment historik për skenën e saj muzikore dhe një mundësi për të ndërtuar ura të reja kulturore ndërkombëtare përmes fuqisë së muzikës.
