Njësia e Komunikacionit Rrugor në Ferizaj ka ndaluar mbrëmë dy shoferë të rinj, të cilët po zhvillonin gara shpejtësie në qytet.
Rasti është shënuar më 26 shtator 2025, rreth orës 23:50, nga rruga “Brahim Ademi” deri te rruga “Driton Islami” në Ferizaj. Shoferët, A.M. (23 vjeç) me veturë të tipit Audi dhe P.M. (20 vjeç) me VW Golf me targa vendore, janë kapur në flagrancë duke marrë pjesë në gara të paligjshme.
Për këtë kundërvajtje të rëndë, policia u ka shqiptuar gjoba prej 500 euro, 5 pikë negative, si dhe ndalim të drejtimit të automjetit për 12 muaj.
Policia Rajonale në Ferizaj ka bërë thirrje për vetëdijesim të shoferëve, duke theksuar se garat e shpejtësisë përbëjnë rrezik serioz për jetën e tyre dhe të pjesëmarrësve të tjerë në trafik. Po ashtu, është paralajmëruar se masat dhe kontrollet me radarë do të intensifikohen në të gjitha rrugët e rajonit, me qëllim të rritjes së sigurisë.
Qytetarët ftohen të raportojnë çdo shkelje të rregullave të trafikut në numrat e policisë: 192, 0290/326-250, 0290/322-406, apo përmes platformës “Lajmëro Policinë”. Policia garanton konfidencialitet të plotë për të gjitha informacionet.
