Partia Demokratike e Kosovës ka zhvendosur këtë të dielë fushatën elektorale për zgjedhjet lokale të 12 tetorit në komunat veriore të vendit, duke mbajtur një tubim në Çabër të Zubin Potokut. PDK theksoi se do të angazhohet për të gjithë qytetarët pa dallim, ndërsa çdo votë në këtë pjesë e konsideroi si vlerë të shtuar për partinë.
Kryetari i PDK-së, Memli Krasniqi, u shpreh se ky është një moment i rëndësishëm për partinë, e cila, sipas tij, tashmë është e shtrirë në çdo pjesë të territorit të Kosovës. Ai falënderoi kryetarët shqiptarë në komunat veriore, duke theksuar se qeverisja atje nuk ka qenë e lehtë.
Krasniqi theksoi se PDK nuk i është frikësuar sfidave dhe kërkoi punë të pandalshme për mbështetjen e katër kandidatëve të partisë.
“Sonte nuk jemi këtu vetëm për të parë prapa, por për të shikuar përpara drejt së ardhmes. Përveç Ilirit e Izmirit, kemi edhe dy kandidatë të jashtëzakonshëm. Ne në PDK jemi krenarë me secilin prej jush. Sot jemi këtu për t’u zotuar para qytetarëve dhe për t’u mobilizuar maksimalisht deri më 12 tetor. Ne nuk iu frikësohemi sfidave, përkundrazi ato na frymëzojnë”, deklaroi Memli Krasniqi, kryetar i PDK-së.
Kandidati i PDK-së për kryetar të Komunës së Zubin Potokut, Izmir Zeqiri, tha se janë të vendosur të sjellin zhvillim dhe përfaqësim të dinjitetshëm, ku të gjithë qytetarët do të ndihen të barabartë. Ai renditi dhjetë prioritete për komunën, me theks të veçantë tek bujqësia, blegtoria dhe infrastruktura.
“Vendosni për të ardhmen tuaj, vendosni më mirë për Zubin Potokun. Programi ynë parasheh investime në bujqësi, blegtori dhe në infrastrukturën rrugore”, tha Izmir Zeqiri, kandidat i PDK-së për Zubin Potokun.
Nga Çabri, Zeqiri përcolli përshëndetje edhe për ish-presidentin Hashim Thaçi dhe ish-kryetarin e PDK-së, Kadri Veseli, të cilët po mbahen në Hagë.
Ndërkaq, kandidatja e PDK-së për kryetare të Komunës së Mitrovicës së Veriut, Flutura Hamza, theksoi se synimi i saj është përkrahja e qytetarëve pa dallim.
“Do të jemi gjithmonë pranë qytetarëve, pa dallime partiake e etnike, vetëm në funksion të përmirësimit të gjendjes reale në terren dhe duke pasur parasysh interesat e tyre”, deklaroi Flutura Hamza, kandidate e PDK-së për Mitrovicën Veriore,
Në tubimin e PDK-së në Çabër morën pjesë edhe kryetarë e nënkryetarë shqiptarë të komunave veriore, si dhe kandidatët e kësaj partie për këto komuna.
