Qindra profile anonime në platformën e shpërndarjes së videove TikTok janë bërë gjithnjë e më aktive në përhapjen e narrativave pro-ruse dhe në mbështetjen e partive radikale përpara zgjedhjeve në Republikën Çeke më 3 dhe 4 tetor, tha një grup joqeveritar.
Online Risk Labs, një grup i sapoformuar analistësh çekë, deklaroi se kishte identifikuar 286 llogari në TikTok që po amplifikojnë përmbajtjen e njëra-tjetrës. Së bashku, ato kanë 5 deri në 9 milionë shikime në javë, që është më shumë se shtrirja totale e udhëheqësve të partive kryesore, tha grupi.
“Urdhrat nuk janë të koordinuara me një parti politike, por tregojnë mbështetje për disa parti radikale dhe ekstremiste në të njëjtën kohë”, thuhet në njoftim.
Sipas raportimeve të mediave lokale, gati një e katërta e çekëve përdorin TikTok, një përqindje më e vogël se në Rumani, ku zgjedhjet presidenciale u anuluan vitin e kaluar për shkak të akuzave për ndërhyrje ruse nëpërmjet llogarive në platformë. Rusia i ka mohuar akuzat.
Rregullatori çek i telekomunikacionit CTU tha se kishte marrë disa ankesa në lidhje me qindra llogari në TikTok.
“Ne i konsideruam këto vërejtje si relevante dhe ia përcollëm ato Komisionit Evropian si autoriteti mbikëqyrës për platformat kryesore”, tha CTU për Reuters, duke shtuar se ishte në kontakt me TikTok.
Llogaritë e TikTok të raportuara nga Online Risk Labs shprehën mbështetje për partitë, përfshirë SPD-në e ekstremit të djathtë, e cila është e treta në shumicën e sondazheve me rreth 13 përqind mbështetje, dhe Stacilo!-n e ekstremit të majtë, e cila sipas sondazheve tejkalon pragun prej pesë përqind për të fituar një mandat, tha grupi. Të dyja partitë thonë se vendi duhet të largohet nga NATO dhe Bashkimi Evropian.
Online Risk Labs deklaruan se kandidatët e promovuar në postime nuk ishin domosdoshmërisht të vetëdijshëm për këtë.
Sondazhet e fundit në prag të zgjedhjeve parlamentare tregojnë se partia opozitare ANO e ish-kryeministrit Andrej Babiš kryeson me një diferencë të madhe krahasuar me SPOLA-n, koalicionin e qendrës së djathtë të kryeministrit Petr Fiala. ANO-s mund t’i duhet mbështetja e SPD-së dhe Stacil! për të formuar shumicën.
