Aleanca për Ardhmërinë e Kosovës sot ishte në aktivitet elektoral në Malishevë. Kryetari i kësaj partie Ramush Haradinaj, tha se projektet e kandidatit të AAK-së për kryetar komune, Enver Hotit, janë të prekshme dhe të realizueshme. E ky i fundit premtoi realizimin e projektit për ujë të pijshëm, ngritje të kapaciteteve në shëndetësi e zhvillim të zonës ekonomike.
Malisheva mund të ndryshojë. Kjo është bindja e drejtuesve të Aleancës për Ardhmërinë e Kosovës, të cilët sot patën tubim elektoral në këtë komunë, për zgjedhjet lokale të 12 tetorit. Ata thanë se shumë problemeve jetike për banorët e kësaj ane do t’u vijë fundi, siç është mungesa e ujit të pijshëm apo përmirësimet në sistemin shëndetësor, nëse për kryetar votohet Enver Hoti, kandidat i AAK-së.
Kryetari i kësaj partie, Ramush Haradinaj, duke kërkuar mbështetje për këtë subjekt politik dhe kandidatin për kryetar nga radhët e kësaj force politike, tha se asnjëherë nuk do të mungojë nga strukturat drejtuese të AAK-së, angazhimi për një jetë më të mirë për banorët e kësaj komune.
Kandidati për kryetar të Malishevës, Enver Hoti, tha se programi i tij është i realizueshëm dhe projektet e tij do t’i japin shtysë të re zhvillimit kësaj komune.
Mes shumë projekteve për të cilat ai u zotua se do të realizohen, janë edhe mbështetja per fermerët, zgjidhja e problemit me mungesën e ujit të pijshëm, reforma në sistemin arsimor, ngritjen e kapaciteteve ne shëndetësi e ndërtimin dhe zhvillimin e zonës ekonomike.
Në fund të këtij tubimi elektoral, drejtues të AAK-së prezantuan edhe kandidatët për Kuvendin Komunal të Malishevës nga kjo parti.
