Partia Demokratike e Kosovës ditën e 17-të të fushatës e ka vazhduar në Skenderaj, aty ku zhvilluan takim me gratë e kësaj komune.
Kandidati PDK-së për kryetar të Skenderajt, Sami Lushtaku u ka premtuar grave të komunës që synon ta drejtojë , trajtim të dinjitetshëm e mbështetje për bizneset e vogla.
Ai tha se janë gratë e Drenicës që e kanë mbajtur PDK-në tash e 26 vite, madje edhe atëherë kur, sipas tij, ishte e vështirë.
“Unë nuk dua të flas as për vetën shumë, as për PDK-në, sepse ju jeni ato që e keni mbajtur PDK-në që 26 vjet, edhe atëherë kur ka qenë e vështirë, edhe atëherë kur ka qenë e pamundur, ju i keni qëndruar besnike PDK-së. Partia Demokratike edhe në Skenderaj edhe në Kosovë është shumë falënderuese për mbështetjen që ia keni dhënë jo vetëm në këto zgjedhje, por në të gjitha zgjedhjet. Unë do të përpiqem që gjatë qeverisë time që gratë të kenë trajtim shumë më të dinjitetshëm, ashtu qysh e meritojnë. Unë besoj që gratë do të kenë një fokus të veçantë, sidomos ato në biznese të vogla. Besoj që me ndihmën tonë ato do të janë nesër biznese të mëdha e do të kenë mundësi të punësojnë edhe vajza edhe gra të tjera”, tha ndër të tjera kandidati për kryetar i Skenderajt, Sami Lushtaku.
Ndërkaq, sekretarja e përgjithshme e PDK-së, Vlora Çitaku tha se ky është viti i PDK-së, duke shprehur bindjen që kjo parti do të fitojë edhe komuna të tjera, pos atyre që kanë pasur deri tash në udhëheqje.
“Nëna të nderuara, motra, kolege mos u ndalni, kemi arritur shumë, por ky nuk është kufiri asaj çfarë kemi bërë bashkërisht. Në Drenicë nuk vijmë të lypim votë, sepse këto gra, këto nana na kanë dhënë shumë më shumë, na kanë dhënë besim. Në Drenicë vijë të marr forcë për beteja të mëdha që na presin. Dhe po, ky është viti i PDK-së, PDK do të rikthehet fuqishëm jo vetëm në komunat ku tashmë jemi në pushtet, por do të rimarrim komuna tjera. A e dini pse?, sepse i kemi kandidatët më të mirë, listën më të mirë, programin më të mirë, dhe jemi më të guximshëm se të gjithë të tjerët”, tha ajo.
Çitaku ka kërkuar zotim nga Lushtaku që do t’i mbështesë kërkesat e grave të komunës së Skenderajt, derisa tha se jo më larg se me 13 tetor bashkë me gratë e kësaj komune do t’i trokasë në derë me një listë projektesh e prioritetesh.
