Radimir Dimiq, kryetari i Multietnikes së Kosovës(MEK), në një deklaratë për media, ka njoftuar se MEK plotësisht e përkrah deklaratën e kryeministrit në detyrë, Albin Kurti rreth politikës së tij për veriun e vendit.
“Derisa skena politike e Kosovës pothuajse e tëra është mobilizuar për ta grabitur pushtetin me çdo çmim, duke prodhuar një bllokadë gati një vjeçare nga zgjedhjet e fundit, e duke kritikuar për gjithçka qeverinë në detyrë me kryeministrin Kurti, nga SHBA kryeministri e bëri të qartë se pavarësisht presioneve dhe shantazheve me të cilat po ballafaqohet, politika e tij shtet ndërtuese nuk ndryshon”, tha ai.
Sipas tij, edhe kësaj herë fokus ishte qasja ndaj veriut të vendit dhe shikimi kritik ndaj masave qeveritare atje nga disa shtete perëndimore dhe SHBA -të.
“Me një qëndrim burshtetasi ai tha se me Veriun e Kosovës nuk ka lojë dhe kompromis sepse atje për asnjë çmim nuk mundë të lejohet të hedhin valle e të sundojnë bandat kriminale dhe grupet paramilitare të orkestruara nga regjimi në Beograd. Ky qëndrim i kreut të qeverisë së Kosovës duhet të mbështetet pa asnjë hezitim nga i gjithë spektri politik i Kosovës, pa dallime etnike sepse është qëndrim i qartë në funksion të sundimit të ligjit, të ruajtjes së paqes dhe tolerancës ndëretnike”, tha ai.
