Ambasadori i Kosovës në Bullgari, Haxhi Bajraktari, është pritur në një takim nga Emil Koshlukov, Drejtor i Përgjithshëm i Televizionit Kombëtar të Bullgarisë (BNT).
Bëhet e ditur se gjatë takimit, ambasadori Bajraktari vlerësoi rolin e BNT-së në informimin e publikut bullgar dhe theksoi rëndësinë e medias publike në ndërtimin e urave të mirëkuptimit mes popujve.
Palët u dakorduan për intensifikimin e bashkëpunimit ndërmjet dy televizioneve kombëtare, Radio Televizionit të Kosovës (RTK) dhe BNT-së, duke përfshirë realizimin e projekteve të përbashkëta dokumentare, shkëmbimin e përvojave profesionale mes gazetarëve si dhe promovimin e kulturës dhe turizmit të të dyja vendeve në platformat publike respektive, njofton ambasada e Kosovës.
Ky bashkëpunim pritet të kontribuojë në forcimin e marrëdhënieve mes Kosovës dhe Bullgarisë përmes mediave publike.
