Dragashi dhe banorët e tij meritojnë vazhdimin e realizimit të projekteve në të mirë të zhvillimit dhe një jete më të mirë. Në formë përmbledhëse, kjo ishte porosia që dha sot në këtë komunë, kryetari i Lidhjes Demokratike të Kosovës, Lumir Abdixhiku, në kuadër të fushatës elektorale.
Derisa kërkoi votën edhe për një mandat për Bexhet Xheladinin, kandidat i kësaj partie për kryetar të Dragashit, Abdixhiku u shpreh se LDK-ja e mban fjalën, prandaj meriton ta ketë vazhdimin e besimit të qytetarëve.
Në përkrahje të kandidatit për kryetar të Dragashit, në tubimin e Lidhjes Demokratike të Kosovës ishte i pranishëm edhe kryetari i kësaj partie, Lumir Abdixhiku. Ai vlerësoi punën e deritanishme të Bexhet Xheladinit, i cili, njëkohësisht, në zgjedhjet e 12 tetorit kandidon edhe për një mandat. Për punët e tij të kryera dhe të tjerat për të cilat tha se do bëhen në të mirë të banorëve të Dragashit, foli kryetari i kësaj partie, Lumir Abdixhiku.
“Kur sot shohim të gjitha këto punë jam i bindur dhe t’ju them të drejtën shumë më shumë krenar se jo që nuk ju zhgënjyem këtë besim të dhënë por e dërguam Dragashin në model të qeverisjes lokale sepse çdo premtim që bëmë e kthyem në punë çdo projekt që e nisëm e quam përpara çdo fjalë qe e dhamë e mbajtëm siç na mëson Lidhja Demokratike e Kosovës”, tha Abdixhiku.
Derisa rikujtoi se premtimet e Xheladinit të dhëna para katër vjetësh, tashmë janë realizuar, Abdixhiku kërkoi edhe një herë votën për të, në mënyrë që, siç tha ai, të realizohen projekte të tjera.
Kandidati për kreytar të Dragashit, Bexhet Xheladini, në fjalën e tij u ndal më shumë tek projektet që synon t’i realizojë gjatë mandatit të tij katër vjeçar.
“Në synojmë ndërtimin e një komune moderne transparente dhe gjithëpërfshirëse ku qytetari është në qendër të çdo vendimi. Qeverisja jonë do të jetë pa asnjë aktakuzë për korrupsion apo për keqpërdorim dhe më një dhe realizim të buxhetit mbi 95% të fokusuar në projekte me ndikim të drejtpërdrejt për qytetarët tanë do të garantojmë transparencë përmes konsultimeve të rregullta me qytetarët dhe forume lokale në përfshirje aktive të qytetarëve në vendim marrje”, tha Xheladini, kandidat për kryetar të Dragashit.
Xheladini premtoi shëndetësi falas, përfshirë edhe disa shërbime sekondare si ato kardiologjike, subvencione, si dhe projekte të shumta për të gjitha fshatrat e Dragashit, nga infrastruktura e deri te ndriçimi publik dhe mirëmbajtja e objekteve shkollore e mjekësore.
Në fund të takimit, u prezantuan edhe lista e kandidatëve për Kuvendin Komunal të Dragashit nga LDK-ja, kurse kandidati për kryetar, Bexhet Xheladini, paraqiti edhe disa nga projektet e përfunduara në mandatin e tij.
