Prokuroria Speciale e Kosovës në bashkëpunim me Policinë e Kosovës, bazuar në urdhrin e Gjykatës Themelore në Prishtinë, ka kryer të hënën një urdhër kontrolli në objektin e Kompanisë Rajonale të Ujësjellësit “Gjakova” dhe në banesën e Kryeshefit Ekzekutiv të kësaj kompanie.
Në komunikatën e përbashkët nga Prokuroria Speciale e Kosovës dhe Policia e Kosovës thuhet se në kuadër të hetimeve të koordinuara midis Prokurorisë Speciale dhe Drejtorisë së Krimeve Ekonomike të Policisë, gjatë këtij operacioni janë sekuestruar dokumente të rëndësishme që do të përdoren si prova në procesin hetimor.
“Hetimet po zhvillohen për shkak të dyshimeve për kryerjen e veprave penale “Keqpërdorimi i pozitës apo autoritetit zyrtar”, ”Falsifikimi i dokumentit zyrtar”, Shmangie nga pagesa e tarifave të detyrueshme doganore ose tarifave akcizore”, dhe “Konflikt i interesit dhe Keqpërdorimi dhe Mashtrimi në prokurorim publik”, thuhet në njoftimin e përbashkët .
Tutje thuhet se Prokuroria Speciale dhe Policia e Kosovës po vazhdojnë veprimet hetimore në përputhje me Kodin e Procedurës Penale, duke u angazhuar për zbardhjen e plotë të rastit.
