Policia e Shqipërisë ka njoftuar se ka parandaluar në Morinë një rast të tentativës për trafikim të një shtetaseje të mitur drejt Kosovës, duke arrestuar në flagrancë një 22-vjeçar dhe pasagjerin që udhëtonte me të.
Sipas njoftimit nga Policia e Shtetit, shërbimet kufitare, në zbatim të masave për goditjen e paligjshmërive në kufi dhe mbi bazën e analizës së riskut, ndaluan në dalje të Republikës së Shqipërisë një automjet të drejtuar nga shtetasi E. G., 22 vjeç, banues në Berat. Në automjet ndodheshin gjithashtu edhe A. K., 18 vjeç, gjithashtu nga Berati, dhe një shtetase e mitur, vetëm 14 vjeçe.
Nga hetimet paraprake dyshohet se E. G. po tentonte të kalonte të miturën në mënyrë të paligjshme në territorin e Kosovës, me qëllim trafikimin e saj.
“Në vijim të veprimeve, specialistët për Hetimin e Trafiqeve të Paligjshme arrestuan në flagrancë shtetasit E. G., 22 vjeç, banues në Berat, për veprën penale ”Trafikimi i të miturve”, Dhe A. K., 18 vjeç, banues në Berat, për veprën penale “Moskallëzimi i krimit””, thuhet në njoftim.
Ndërkohë, më datë 28.09.2025, familjarët e 14-vjeçares kanë paraqitur kallëzim në Drejtorinë Vendore të Policisë Durrës, duke raportuar largimin e saj nga banesa.
Bëhet e ditur se hetimet për zbardhjen e plotë të ngjarjes vijojnë, teksa materialet procedurale i janë referuar Prokurorisë për veprime të mëtejshme.
